Siglir tar il cuntegn

Header

video
Ils davos meters da Nino Schurter sin via via al record.
Or da Sport-Clip dals 11.06.2023.
laschar ir. Durada: 1 minuta 22 Secundas.
cuntegn

Cuppa mundiala mountainbike Victoria istorica a chasa per Nino Schurter

audio
Il record da Nino Schurter: valitaziun dal redactur da sport Andreas Wieland
ord Actualitad dals 12.06.2023. Maletg: RTR
laschar ir. Durada: 5 minutas 26 Secundas.

Igl è stà ina demonstraziun. Nino Schurter è stà sin ina missiun, gudagnar pli probabel sia davosa cursa da chasa a Lai e festivar sia 34avla victoria en la cuppa mundiala ed uschia realisar in nov record. Tut è ì si perfect.

audio
Intervista cun Nino Schurter suenter sia victoria istorica a Lai
ord Actualitad dals 12.06.2023. Maletg: Keystone
laschar ir. Durada: 2 minutas 42 Secundas.

Nino Schurter ha dictà il tempo davent da la partenza e gia baud pudì sa distanziar da l'entira concurrenza. Las davosas rundas è il mountainbiker da Tersnaus stà persuls a la testa cun per part in avantatg da passa ina mesa minuta.

video
Nino Schurter: «Igl è la paraula perfecta»
Or da Sport-Clip dals 11.06.2023.
laschar ir. Durada: 2 minutas 53 Secundas.

En l'arrivada è Nino Schurter vegnì beneventà da radund 13'000 fans frenetics. Il plaschair da finalmain cuntanschì quest record è immens tar Schurter e ses entir team. I saja in di perfetg ha il grond campiun manegià curt suenter la cursa. Fin oz parteva Schurter il record da 33 victorias cun la legenda franzosa Julien Absalon. Il nov record da 34 victorias en la cuppa mundiala è in ulteriura cifra magica en la carriera da Nino Schurter. Il Lumnezian ha er gudagnà aur, argient e bronz a gieus olimpics, è daventà 10 giadas campiun mundial e gudagnà otg giadas la cuppa mundiala generala.

La cursa da cross-country ha Lai ha Nino Schurter gudagnà avant il Sidafrican Alan Hatherly (+15 sec.) ed il Franzos Jordan Sarrou (+16 sec.)

Nino Schurter
Legenda: Ina duscha da schampagn bain meritada. Keystone

Vital Albin sut ils top 15

L'auter mattadur local e mountainbiker da Tersnaus, Vital Albin, ha terminà la cursa sco 15avel cun in retard da 2:27 minutas sin Nino Schurter. Vital Albin è stà durant las emprimas rundas a la testa da la cursa, la finala lura dentant stuì ceder encunter ils pli ferms dal di.

audio
Intervista cun Vital Albin suenter ses 15avel plaz
ord Actualitad dals 12.06.2023. Maletg: Keystone
laschar ir. Durada: 1 minuta 22 Secundas.

Cun Thomas Litscher sco 9avel ha anc in ulteriur svizzer cuntanschì in plaz sut ils top 10. Mathias Flückiger è vegnì 11avel e Lars Forster 13avel.

La victoria a Lai è in ulteriur punct culminant en la carriera extraordinaria da Schurter sper sia victoria olimpica, ses 10 campiunadis mundials e 8 titels da la cuppa mundiala.

Alessandra Keller puspè sin il podest

Grazia ad ina grondiusa finiziun ha Alessandra Keller danovamain cuntanschì in plaz da podest a la cursa da la cuppa mundiala da cross-country a Lai. La mountainbikera dal chantun Sutsilvania è vegnida terza, sco gia avant in onn.

video
Alessandra Keller cumbatta fin sin il terz plaz
Or da Sport-Clip dals 11.06.2023.
laschar ir. Durada: 1 minuta 2 Secundas.

Keller è ditg stada en la gruppa da testa ed ha la finala gudagnà il cumbat per il terz plaz encunter la campiunessa mundiala Pauline Ferrand Prevot. Per Alessandra Keller èsi il terz plaz da podest ad ina cursa da la cuppa mundiala sur la distanza olimpica. La stagiun passada vev’ella tranter auter triumfà a Snowshoe en ils Stadis Unids.

video
Keller: «Jau era cumplettamain en in tunnel»
Or da Sport-Clip dals 11.06.2023.
laschar ir. Durada: 1 minuta 58 Secundas.

Loana Lecomte sco gia il 2022

La campiunessa d’Europa Loana Lecomte ha danovamain triumfà a Lai. La Franzosa ha mussà ina cursa perfetga ed en la davosa runda pudì sa distanziar da l’entira concurrenza. A la fin ha Lecomte cuntanschì l’arrivada cun in avantatg da 18 secundas sin l’Ollandaisa Anne Terpstra. Alessandra Keller sco terza ha pers 32 secundas.

Terrada per il rest da las Svizras

Betg ì sco giavischà èsi a tut las autras mountainbikeras svizras. In plaz sut las top 15 hai sulet anc dà per LInda Indergand sco 15avla cun in retard da passa trais minutas. Sina Frei è vegnida 17avla e Jolanda Neff ha stuì sa cuntentar cun il 18avel plaz.

Ginia Caluori manchenta il podest be piz a cup

La giuvna mountainbikera da Panaduz ha suenter ses segund plaz en la cursa da short track er persvadì a la cuppa mundiala a Lai en la cursa da cross-country da las dunnas sut 23 onns. Caluori è vegnida quarta ed ha manchentà il podest per be 18 secundas. L’autra grischuna, Lorena Cadalbert da Cuira, ha stuì sa cuntentar cun il 41avel plaz cun in retard da passa diesch minutas.

Ginia Caluori
Legenda: Ginia Caluori po mirar enavos sin ina grondiusa cuppa mundiala a Lai. RTR, Andreas Wieland

In plaz da podest hai perencunter dà per Ronja Blöchlinger. La victura da la cursa da short track da l’Appenzell Dadora è vegnida segunda. Gudagnà la cursa da las dunnas U23 ha sco gia a l’emprima cursa da la cuppa mundiala a Nove Mesto en la Tschechia la Danaisa Heby Sofie Pdersen. Cumplettà il podest sco terza ha la Taliana Sara Cortinovis.

Triumf per Dario Lilla tar ils U23

Di perfetg per Dario Lillo. L’actual campiun svizzer dals U23 ha gudagnà la cursa da cross-country dals U23 a Lai. Il mountainbiker dal chantun Son Gagl ha attatgà en la davosa runda ed pudì sa distanziar da la gruppa da testa cun tschintg atlets. La finala ha Dario Lillo gudagnà duas secundas avant il Canadais Carter Woods. Cumplettà il podest sco terz ha il Franzos Adrien Boichis. Cun Luke Wiedmann sco 7avel e Finn Treudler sco 9avel han anc dus ulteriurs svizzers cuntanschì in plaz sut ils top 10.

Janis Spescha, Janis Baumann
Legenda: ils dus grischuns: Janis Spescha e Janis Baumann (dretg) RTR, Andreas Wieland

Janis Baumann n'è betg dal tut cuntent

Janis Baumann dad Igis ha pers 3:35 secundas sin ses cumpatriot Dario Lillo e terminà la cursa sco 26avel. Quai na saja betg il resultat ch’el haja giavischà, ma dapli na saja il mument betg pussibel. Perencunter saja stà ina grondiusa atmosfera cun tants fans svizzers a questa cursa da chasa, uschia Janis Baumann.

Janis Spescha da Cuira ha pers bun otg minutas ed è vegnì 74avel.

Camille Balanche manchenta stgars la victoria a chasa

video
La cursa da downhill da Camille Balanche a Lai
Or da Sport-Clip dals 10.06.2023.
laschar ir. Durada: 3 minutas 7 Secundas.

Camille Balanche da Neuchâtel è vegnida segunda en l'emprima cursa da la cuppa mundiala da downhill en questa stagiun a Lai. Sco gia avant in onn ha ella manchentà be per pauc sia emprima victoria a la cursa da chasa a pe dal Rothorn. Balanche ch'era stada la pli sperta en la qualificaziun sco era en il mezfinal ha pers en il final bun ina mesa secunda sin la victura Rachel Atherton da la Gronda Bretagna. Cumplettà il podest sco terza ha la Tudestga Nina Hoffmann.

video
Balanche: «Jau stos esser cuntenta cun il segund plaz»
Or da Sport-Clip dals 10.06.2023.
laschar ir. Durada: 1 minuta 30 Secundas.

Tar ils umens gudogna Robert Jordan Williams la cursa da downhill. Il giuven englais da 18 onns procura uschia per ina surpraisa. El è numnadamain stà l'emprima giada a la partenza dad ina cursa da la cuppa mundiala. Il Brit ha triumfà avant ils dus Franzos Loris Vergier e Loic Bruni.

Schurter vegn bittà per terra tar la cursa short track

video
Nagina schanza per Nino Schurter suenter il crash cun Samuel Gaze
Or da Sport-Clip dals 09.06.2023.
laschar ir. Durada: 29 Secundas.

La cuppa mundiala da mountainbike a Lai n’ha betg cumenzà bain per Nino Schurter. En la 8avla da 10 rundas è Same Gaze da la Nova Zelanda, l’actual campiun mundial en la cursa da short track, glischnà ora e ha era bittà Nino Schurter per terra. Schurter era fin a quest mument en la gruppa da testa.

video
Nino Schurter: «Jau n'hai gì nagina schanza da guntgir»
Or da Sport-Clip dals 09.06.2023.
laschar ir. Durada: 2 minutas 23 Secundas.

La finala ha Nino Schurter, il mountainbiker rutinà da 37 onns, terminà la cursa sco 16avel. Uschia po Schurter parter la dumengia a la cursa da cross-country be or da la segunda retscha.

Vital Albin sut ils top 10

Meglier èsi ì a Vital Albin, l’auter mountainbiker da Tersnaus. El è adina stà sin ils chaltgogns a la gruppa da testa ed è uschia vegnì 9avel davos ses dus collegas d’equipa Mathias Flückiger ch’è vegnì 6avel e Lars Forster ch’è vegnì 7avel. Cun Marcel Guerrini sco 10avel ha anc in quart svizzer cuntanschì in plaz sut ils megliers 10.

audio
Nino Schurter e Vital Albin davart la cursa short track a Lai
ord Actualitad dals 10.06.2023. Maletg: Keystone
laschar ir. Durada: 2 minutas 43 Secundas.

Gudagnà la cursa da short track dals umens d’elita ha Luca Schwarzbauer. Il Tudestg ha pudì sa distanziar da l’entira concurrenza en la davosa runda. Cumplettà il podest han il Franzos Jordan Sarrou sco segund ed il Danais Sebastien Fini Carstensen sco terz.

video
Mathias Flückiger: «A mi ha mancà in zic il schlantsch»
Or da Sport-Clip dals 09.06.2023.
laschar ir. Durada: 2 minutas 9 Secundas.

Alessandra Keller sin il podest

Ina plazza da podest per la Svizra hai dà en la cursa da short track da las dunnas d’elita. Alessandra Keller è vegnida segunda. Gudagnà la cursa a moda suverana ha Jenny Rissveds. Per la Svedaisa èsi la terza victoria en seria en la cursa da short track a Lai. Terza è vegnida la campiunessa mundiala, la Franzosa Pauline Ferrand-Prévot.

video
Alessandra Keller: «La cursa è ida si perfetg»
Or da Sport-Clip dals 09.06.2023.
laschar ir. Durada: 1 minuta 59 Secundas.

Las ulteriuras svizras n’han betg dal tut pudì persvader a lur cursa da chasa. Cun Sina Frei sco 8avla ha almain anc ina segunda svizra cuntanschì in plaz sut las top 10. Linda Indergand ha terminà la cursa sco 14avla e Jolanda Neff ha stuì sa cuntentar cun il 17avel plaz.

Ginia Caluori procura per ulteriur exploit

La Cuppa mundiala da mountainbike a Lai ha cumenzà bain per la Svizra. Gist en l’emprima cursa hai dà ina victoria dubla per las dunnas sut 23 onns. Ginia Caluori da Panaduz ha terminà la cursa da short track sin il segund plaz davos sia cumpatriota Ronja Blöchlinger.

audio
Ginia Caluori da Panaduz marscha da success a success
ord Actualitad dals 09.06.2023. Maletg: Keystone
laschar ir. Durada: 2 minutas 49 Secundas.

Per la giuvna grischuna Ginia Caluori ch’ha midà pir avant paucs onns dal ski alpin tar il sport da mountainbike è quai in ulteriur grond success. Gia mez matg a l’emprima cursa da la cuppa mundiala en questa stagiun era Ginia Caluori vegnida segunda en la cursa da cross-country.

Rangaziun short track dunnas U23:

  1. Ronja Blöchlinger (SUI) 21:10 minutas
  2. Ginia Caluori (SUI) +0:11 secundas
  3. Heby Sofie Pedersen (DEN) +0:12 secundas
Ginia Caluori
Legenda: Podest da la cursa da short track da las dunnas U23. RTR, Andreas Wieland

Er en la cursa da short track dals umens U23 hai dà ina victoria svizra. Dario Lillo ha gudagnà cun in avantatg da 7 secundas avant il Franzos Adrien Boichis. Cumplettà il podest sco terz cun in retard da 9 secundas ha il Canadais Carter Woods. Janis Baumann dad Igis ha terminà la cursa sin il 21avel plaz cun in retard da 1:01 minutas.

Lai retschaiva l’elita mundiala da mountainbike

La cuppa mundiala da mountainbike è enavos en il Grischun. Dals 8 – 11 da zercladur s’inscuntra l’elita mundiala gia per la 7avla giada a Lai. Sin il program stattan tradiziunalmain cursas en las disciplinas cross-country, short track, downhill e cross-country olimpic.

audio
Tge spetga a las cursas da la cuppa mundiala a Lai?
ord Actualitad dals 08.06.2023. Maletg: Keystone
laschar ir. Durada: 7 minutas 16 Secundas.

Durant ch’ils mountainbikers da cross-country han lantschà la nova stagiun da la cuppa mundiala mez matg a Nove Mesto en Tschechia vegnan ils downhillers per l’emprima giada en acziun a Lai en questa stagiun. Auter ch’ils onns avant datti gia las emprimas cursas la gievgia. Sper las cursas da qualificaziun da downhill da las junioras e dals juniors cumbattan quai di ils mountainbikers U23 per ils emprims plazs da podest en las cursas da short track.

Schurter
Legenda: Er quest onn vegn spetgà in grond cumbat tranter Nino Schurter e Mathias Flückiger. Keystone

Lai è stà dapi il 2015 regularmain in punct fix en il chalender da la cuppa mundiala da mountainbike. Il 2015, 2016, 2017, 2019, 2021, 2022 e 2023 ha Lai pudì manar atras cursas da la cuppa mundiala, il 2018 è schizunt vegnì cumbattì al pe dal Rothorn per medaglias al campiunadi mundial, franc il punct culminant.

Proxima schanza per Nino Schurter

Nino Schurter ch’è vegnì a Lai il 2018 campiun mundial vul festivar quest onn a sia cursa da chasa sia 34avla victoria en la cuppa mundiala ed uschia realisar in nov record. Actualmain parta el quest record da 33 victorias cun la legenda franzosa Julien Absalon.

audio
Nino Schurter vul cuntanscher in ulteriur record a sia cursa da chasa
ord Actualitad dals 09.06.2023. Maletg: RTR
laschar ir. Durada: 2 minutas 3 Secundas.

Avant in onn era Schurter sin buna via da realisar quest record. Curt avant l’arrivada è il mountainbiker oriund da Tersnaus dentant crudà suenter che Flückiger ha vulì surpassar Schurter en la davosa passascha tras il guaud. Enstagl da festivar ina victoria dubla per la Svizra han Flückiger e Schurter stuì sa cuntentar cun ils plazs trais e quatter. Dapi quai di è la rivalitad tranter Schurter e Flückiger anc pli gronda. Gudagnà la cursa a Lai il 2022 ha la finala il Talian Luca Braidot.

audio
Il drama tranter Nino Schurter e Mathias Flückiger il 2022
ord Actualitad dals 10.06.2023. Maletg: Keystone
laschar ir. Durada: 3 minutas 9 Secundas.

Plirs Grischuns en il focus

Dasper Nino Schurter stat ord vista grischuna principal Vital Albin en il focus. Il mountainbiker da 24 onns ha definitiv fitgà pe en la cuppa mundiala e cun ses buns resultats da l’onn passà er mussà ch’el ha las qualitads da cumbatter per in plaz da podest a Lai. Vid la motivaziun na vegnì betg a mancar a questa cun tants fans grischuns. Decisiv saja dentant da betg esser surmotivà, mabain restar quiet ed ir cun il chau, uschia Vital Albin ch’era daventà avant in onn a Lai 13avel en la cursa roiala da cross-country.

audio
Vital Albin – profi atlet, trenader e student
ord Actualitad dals 08.06.2023. Maletg: Keystone
laschar ir. Durada: 4 minutas 14 Secundas.

Er far furora a Lai vul Ginia Caluori da Panaduz che parta en la categoria da las dunnas U23. La giuvna ch’ha midà pir avant intgins onns dal ski alpin tar il sport da mountainbike vala sco ina da las grondas speranzas svizras per l’avegnir. A l’emprima cursa da la cuppa mundiala avant paucas emnas a Nove Mesto ha Caluori procurà per in exploit cun ses segund plaz. In segund plaz tar las dunnas U23 hai er dà al campiunadi svizzer la davosa fin d’emna a Crans-Montana en il Vallais.

audio
È quest onn la derniera per la cuppa mundiala da mountainbike a Lai?
ord Actualitad dals 10.06.2023. Maletg: Keystone
laschar ir. Durada: 2 minutas 57 Secundas.

Èsi la derniera a Lai?

La proxima stagiun na datti naginas cursas da las cuppa mundiala al pe dal Rothorn. La raschun è ch’il campiunadi mundial da mountainbike ha lieu il 2025 a Crans-Montana. Ils organisaturs vallesans dastgan perquai organisar in onn avant quest punct culminant, pia l’onn proxim, ina cuppa mundiala sco emprova generala. Perquai croda Lai dentant sco segunda destinaziun svizra ord il program da cursas 2024. Sche la cuppa mundiala turna perencunter puspè enavos en il Grischun a partir dal 2025 è anc avert. Il mument en ils organisaturs da Lai cun il president Christoph Müller vid contractar cun la UCI.

RTR actualitad 11:00

Artitgels legids il pli savens