Il grond favurit britannic Thomas Pidcock ha suenter la cursa da short track er gudagnà la cursa da cross-country sur la distanza olimpica a Nové Mêsto en la Tschechia. Per Pidcock èsi la terza victoria en seria a Nové Mêsto. La finala ha il Brit battì il Franzos Joshua Dubau per 5 secundas.
Cumplettà il podest sco terz ha Nino Schurter. Il Grischun ha battì en il sprint per quest terz plaz il Franzos Jordan Sarrou. Il Lumnezian ha cuntanschì l’arrivada cun in retard da 23 secundas sin il campiun olimpic Thomas Pidcock. Per Schurter che aveva gudagnà tschintg giadas la cursa a Nové Mêsto tranter il 2012 ed il 2018 èsi en tut il 12avel plaz da podest en Tschechia.
Cun Mathias Flückiger sco 7avel (+1:50 min) e Lars Forster sco 8avel (+1:59 min) èn anc dus ulteriurs svizzers sa classads sut ils top 10. Ina buna prestaziun ha er mussà Vital Albin sco 11avel cun in retard da 2:35 minutas.
Puck Pieterse procura per ina sensaziun
La mountainbikera neerlandaisa Puck Pieterse gudogna l’emprima cursa da la cuppa mundiala en questa stagiun sur la distanza olimpica a Nové Mêsto en la Tschechia. La Neerlandaisa ha attatgà en la davosa runda ed uschia triumfà avant las duas franzosas, la campiunessa mundiala Pauline Ferrand Prevot e la campiunessa d’Europa Loana Lecomte.
Meglier po in debut betg gartegiar. Puck Pieterse ha absolvì sia emprima cursa insumma cun l’elita e gist laschà l’entira concurrenza en la sumbriva. Fin l’onn passà è la giuvna da 21 onns stada a la partenza en la categoria da las U23.
Keller meglra svizra sco 5avla – Neff lunsch enavos
Persvadì a Nové Mêsto ha er Alessandra Keller. La victura dal classament general da la stagiun passada ed actuala numer 1 dal mund è vegnida sco meglra Svizra 5avla. In plaz sut las top 10 hai er dà per Sina Frei sco 9avla. Percunter ha Jolanda Neff stuì sa cuntentar cun il 15avel plaz gist avant Linda Indergand sco 16avla.
Ginia Caluori cun exploit
La cuppa mundiala da mountainbike 2023 ha cumenzà grondius per Ginia Caluori. La giuvna da Panaduz ch’ha lantschà pir avant bun trais onns ina carriera da mountainbike è vegnida segunda en la cursa da cross-country da las dunnas U23 a Nové Mêsto. Sin la victura, Sofie Pedersen dal Danemarc, ha Caluori ch’ha be 20 onns pers ina mesa minuta. Cun Noëlle Buri sco 5avla ha er la collega d’equipa da Ginia Caluori persvadì en la Tschechia.
In plaz da podest hai er dà per ils umens svizzers sut 23 onns. Là è Dario Lillo da Son Gagl che vala sco in dals megliers mountainbikers e ciclist champester da sia generaziun vegnì segund, be duas secundas davos Oliver Vedersø Sølvhøj dal Danemarc. Il Grischun Janis Baumann dad Igis è vegnì 27avel.
Hutter e Solèr sut las top 10
Cuntentas cun la cursa da la cuppa mundiala da las junioras a Nové Mêsto pon er esser las duas grischunas Anina Hutter e Chiara Solèr. Hutter da Trimmis è vegnida 8avla, Solèr da Lumbrein 9avla. Sin la victura americana Andie Aagard han las duas grischunas pers bun trais minutas.
