Siglir tar il cuntegn

Header

audio
10avel titel da campiun mundial: «Ina prestaziun enorma»
Or da Actualitad dals 29.08.2022.
laschar ir. Durada: 6 minutas 24 Secundas.
cuntegn

Mountainbike cross-country Schurter per la 10avla giada campiun mundial

  • Nino Schurter è per la 10avla giada campiun mundial en la disciplina da cross-country
  • A Les Gets en Frantscha ha el procurà per la decisiun 6,5 kilometers avant l'arrivada
  • Nagina schanza sin il titel ha gì il grond favurit, il Brit Tom Pidcock ch'è vegnì quart

Andreas Wieland: «Nino Schurter è in fenomen»

Avrir la box Serrar la box
Legenda: Andreas Wieland, redactur da sport RTR

10avel titel da campiun mundial – strusch da crair. Er cun 36 onns mussa il mountainbiker oriund da Tersnaus tgi ch’i vala da batter cura ch’i va per titels e medaglias. Surstar fa principal sia nunditga constanza sur tut quels onns. Quai mussan er las cifras: Dasper ils 10 titels da campiun mundial ha Schurter gudagnà trais medaglias olimpicas, 33 cursas da la cuppa mundiala e gudagnà fin oz set giadas il classament general da la cuppa mundiala.

Sper il grond talent lavura Nino Schurter dentant era fitg per ses success, e quai a moda minuziusa. El mira sin mintga detagl. Plinavant ha Schurter il grond dun da pudair mussar la meglra prestaziun al di x, al di ch’i quinta. Lura constat er ses conturn, principal ses team da Scott cun il schef d’equipa Thomas Frischknecht è sco ina gronda famiglia. E cun tut sia experientscha vegn el er 13 onns suenter ses emprim titel da campiun mundial da tegnair ils giuvens en sia sumbriva.

Uschè ditg ch’el possia cumbatter per titels na lessi el betg terminar la carriera, quai ha Nino Schurter menziunà pliras giadas. Ins po pia ir da quai anora ch’il Lumnezia è er cun 37 onns a la partenza da la cuppa mundiala da mountainbike. Ed er la proxima stagiun dastga Nino Schurter sa mussar cun il tricot da campiun mundial, in tricot ch’ha ina gronda muntada en la scena da velo. Igl è in’onur da dastgar ir a la partenza cun quest tricot alv cun las colurs d’in artg. E resta Schurter fit e saun prenda el franc en mira ils proxims gieus olimpics, il 2024 a Paris.

Il 2009 a Canberra en l'Australia era Nino Schurter daventà l'emprima giada campiun mundial da mountainbike. 13 onns pli tard turna el a chasa da Les Gets cun il 10avel titel.

audio
Nino Schurter: «Jau sun uschè cuntent»
ord RTR Audio dals 29.08.2022.
laschar ir. Durada: 24 Secundas.

Per l'acziun decisiva en ina cursa spectaculara ha il mountainbiker oriund da Tersnaus procurà 6,5 kilometers avant l'arrivada. En ina fasa nua ch'il tempo era crudà ensemen ha Schurter attatgà. Dal quartet a la testa ha sulet David Valero Serrano pudì restar sin ils chaltgogns a Schurter. Il Spagnol è la finala vegnì segund ed ha uschia gudagnà argient (+0:09 sec.). Cumplettà il podest sco terz davos il Svizzer ed il Spagnol ha il Talian Luca Braidot (+0:29 sec.).

Il grond favurit, Tom Pidcock, ha tar l'attatga da Nino Schurter pers il contact cun la testa ed è vegnì distanzià. Silsuenter è Pidcock anc crudà ina giada per terra ed er anc vegnì franà d'in defect uschia che las medaglias èn stadas davent. Tom Pidcock ha stuì sa cuntentar cun il quart plaz.

Schurter en costas

Nino Schurter è stà a partir da la partenza en la gruppa da testa. En la terza da set rundas è il mountainbiker da 36 onns dentant cupitgà tar in descensiun. Quest incap n'ha dentant betg fermà il campiun da record. Curt suenter ha el puspè chattà la via enavos en la gruppa da testa.

audio
Vital Albin è cuntent cun sia premiera tar l'elita
ord RTR Audio dals 29.08.2022.
laschar ir. Durada: 43 Secundas.

Vital Albin sut ils top 15

Er ina fitg buna prestaziun ha mussà Marcel Guerrini ch'è sco segund meglier svizzer vegnì 5avel (+1:40 min.). In plaz sut ils top 10 hai er dà per il Tessinais Filippo Colombo sco 9avel (+2:49 min.). Il segund grischun, il Lumnezian Vital Albin, ha terminà sia emprima cursa d'elita ad in campiunadi mundial suenter difficultads en las primas dus rundas sin il 15avel plaz (+3:28 min.).

RTR novitads 17:00

Artitgels legids il pli savens

Scrollar a sanestra Scrollar a dretga