Vital Albin ha pers 2:31 minuta sin il victur, il mattadur local Filippo Colombo. Il Tessinais ha gudagnà en sia patria avant il Franzos Titouan Carod. Terz è vegnì Mathias Flückiger, l’actual numer 1 dal mund e victur da la cuppa mundiala generala 2021.
Ina fitg buna prestaziun ha er Janis Baumann dad Igis mussà. Il giuven talent da 19 onns ha pers exact quatter minutas e terminà la cursa sin il 9avel plaz. Ursin Spescha da Sevgein ha pers bun nov minutas ed è vegnì 23avel.
Linda Indergand sin il podest
Tar las dunnas ha triumfà la gronda favurita, la Franzosa Loana Lecomte avant l’Ollandaisa Anne Terpstra e la Svizra Linda Indergand. Sin plazza quatter fin sis èn classadas las Svizras Alessandra Keller, Sina Frei e Nicole Koller.
Nova seria da cursas
«Bike Revolution» è ina seria da cursas ch’è vegnida lantschada quest onn da Nino Schurter e l’anteriur profi Ralph Näf. En quest emprim onn stattan sin il program trais cursas. La proxima è dals 22 fin ils 24 d’avrigl a Cuira – in City Event. Nino Schurter sez n’è betg stà a la partenza en il Tessin. El è sa participà la davos’emna al Cape Epic en l’Africa dal Sid, quai ensemen cun ses collega d’equipa Lars Forster.
