Nino Schurter ha demonstrà a Nove Mesto ch'el s'auda er cun ses 36 onns tranter ils megliers dals megliers. Suenter in defect, in plaz tar la roda davos, aveva Schurter in retard da bun ina minuta e mesa sin la gruppa a la testa. Suenter la pausa sfurzada en la zona tecnica ha Schurter auzà la cadenza e smatgà sin il tempo. La chatscha enavant ha cumenzà. Al cumenzament da la davosa runda ha Nino Schurter puspè fatg part a la gruppa da testa.
Tar l'attatga decisiva entras il Rumen Vla Dascalu han però mancà las forzas a Schurter. La finala ha el cuntanschì l'arrivada cun in retard da 30 secundas sin Tom Pidcock, il Brit ch'ha gudagnà il sprint final encunter Dascalu che stat uschia er gia per la terza giada sin il podest da la cuppa mundiala en questa stagiun.
Grazia a ses effort enorm, quai dus dis suenter ses anniversari da 36 onns, resta Nino Schurter a la testa dal classament general da la cuppa mundiala. L'avantatg sin il segund, Tom Pidcock, munta a 132 puncts.
Vital Albin cun meglier resultat da la carriera
Ils Svizzers han persvadì a Nove Mesto sco anc mai en questa stagiun. Sut ils top 10 èn classads gist quatter svizzers. Mathias Flückiger ha sco 6avel manchentà be per pauc ses emprim plaz da podest en questa stagiun. Cun Andri Frischknecht sco 8avel e Vital Albin sco 10avel han dus Svizzers procurà per il meglier resultat da la carriera.
Vital Albin oriund da Tersnaus ha cuntanschì ses emprim plaz sut ils top 10 grazia ad ina grondiusa finiziun. Sin las davosas duas rundas ha el surpassà concurrent per concurrent, tranter auter il Brasilian Henrique Avancini, il Tschec Ondrej Cink u il Franzos Jordan Sarrou, tut atlets ch'audan tranter ils megliers dal mund. Stuì dar si la cursa ha il Tessinais Filippo Colombo.
Jolanda Neff manchenta il podest
A la cuppa mundiala da mountainbike a Nove Mesto en Tschechia, ha Jolanda Neff manchentà il podest en la cursa da cross-country. La Svizra è vegnida quarta, quai suenter ch'el veva gudagnà dus dis avant la cursa da short track. Dasper Jolanda Neff han anc duas ulteriuras svizras dumagnà il pass tranter las top 10 – Alessandra Keller sco 8avla e Sina Frei sco 10avla. Gudagnà la cursa roiala da cross-country ha l'Australiana Rebecca McConnell avant la Franzosa Loana Lecomte e la Svedaisa Jenny Rissveds.
