L’atun 2018 aveva Alice Kühne surpiglià il post sco trenadra naziunala da downhill da Lars Peyer. Al campiunadi mundial da la fin d'emna passada a Les Gets en Frantscha, è la Grischuna stada per la davosa giada en questa funcziun. En l’avegnir vul Kühne metter ses focus anc dapli sin la psicologia. En questa funcziun resta ella er fidaivla a Swiss Cycling, e po uschia er lavurar en l’avegnir fitg stretg cun atletas ed atlets. Quai dentant betg sulet cun atlets da downhill, mabain tranter auter er cun atlets da cross-country.
Manà Balanche al titel da campiunessa mundiala
Durant ils bun quatter onns sco trenadra naziunala ha Alice Kühne principalmain pudì festivar gronds success cun Camille Balanche dal chantun Neuchâtel. Il 2020 è Balanche daventada a Leogang en l’Austria campiunessa mundiala. Quai saja stà il mument il pli emoziunal, manegia Alice Kühne.
Alice Kühne ha surdà las hottas a Carina Cappellari, oriunda da Walenstadt. L’anteriura atleta è tranter auter daventada trais giadas en seria campiunessa svizra da downhill (2017 fin 2019). Il post da Cappellari ch’ha 30 onns sa numna da nov trenadra naziunala MTB Gravity. Dasper la disciplina downhill è Carina Cappellari er responsabla per las disciplinas enduro e pumptrack.
