Per l'EHC Cuira na vai questa stagiun anc betg sco giavischà. Suenter che la squadra da Cuira aveva gudagnà la fin october il derbi grischun cunter l'EHC Arosa avevan ils da la chapitala la speranza ch'i giaja ensi. Mo alura hai puspè dà duas terradas en seria, e quai cunter adversaris ch'il EHC Cuira stuess atgnamain batter.
Er il EHC Bülach è in adversari ch'è atgnamain da dumagnar per la squadra dals frars von Arx e quai è alura er reussì. Gia suenter 3 minutas ha Wesely Haueter sajettà il EHC cun 1:0 en avantatg. Quai è silsuenter er restà uschia fin en l'ultim terz. Alura ha Cuira sajettà il 2:0 entras Mauro Frehner. Dentant be 17 secundas pli tard ha Bülach udì far il 1:2. Curt avant la fin ha la squadra turitgaisa prendì or il goli - en consequenza ha dentant Mauro Frehner fatg ses segund gol da la saira en il gol vid.
Cun 16 puncts ord 13 partidas resta l'EHC Cuira sin posiziun 10 da la tabella ed uschia sut il stritg. La proxima partida giogan ils da Cuira alura sonda proxima a chasa cunter Martigny.
