Ils temps da record da Alex Wilson da la dumengia passada na vegnan betg omologisads. Il sprinter basilais aveva fatg ad Atlanta (USA) novs records svizzers sur 100 e 200 meters. Las 9,84 secundas sur 100 meters fissan schizunt stà record europeic.
Sco quai che Swiss Athletics ha dà enconuschents haja mancà al meeting ad Atlanta l'uschenumnà sistem d'infurmaziun da partenza. Quel annunzia per exempel sin fundament dal temp da reacziun partenzas anticipadas. Quest sistem è necessari per pudair omologisar in record mundial u europeic.
Ils temps da Wilson na vegnan però er betg valitads sco records svizzers. Examinaziuns da Swiss Athletics en collavuraziun cun la federaziun continentala e mundiala da la Federaziun d'atletica leva dals Stadis Unids e tar l'organisatur dal meeting hajan mussà ch'ulteriuras pretensiuns per temps valaivels n'eran betg ademplidas.
