Il gieu encunter Genevra Servette è stà davent da l’entschatta in gieu da sis puncts. Vul dir, ch'il HCD avess pudì far cun ina victoria encunter Genevra in impurtant pass en direcziun playoff. Genevra è numnadamain sin ils chaltgogns dad Tavau. Suenter la sconfitta a Tavau importa l’avantatg dal HCD mo pli quatter puncts sin Genevra.
Pers il gieu durant ils emprims dus terz
Fin en la 24avla minuta è l’equipa dal Lac Léman ida cun dus gols en avantatg. Pir lura è vegnida la reacziun dal HCD. Il gol da Julian Schmutz n’ha dentant betg purtà il midament en il gieu. Genevra ha pudì far vinavant ses gieu ed il HCD n'è betg pli stà capabel da far in ulteriur gol. Era betg cun dar durant las duas ultimas minutas cun sis cunter tschintg da Genevra. La sconfitta gist suenter la pausa dals gieus olimpics n'è sa chapescha betg quai ch'il HCD vuleva. La finamira era da terminar la qualificaziun sin las emprimas sis plazzas, ed uschia dad esser direct en ils playoffs. I restan anc otg gieus da qualificaziun, l’emprima schanza da far dentant in impurtant pass en questa direcziun ha il HCD manchentà.
Pugns tranter Richard ed Ambühl
En il gieu è vegnì cumbattì fin tar la davosa secunda. Quai mussa er la lutga amez il gieu tranter Tanner Richard da Genevra ed il capitani dal HCD Andres Ambühl. Omadus han mussà ils pugns ed èn vegnids tramess per quai da l’arbiter sut la duscha.
