Duas partidas, duas victorias. Suenter sis sconfittas en seria as ha il HCD puspè deliberà da la crisa. L’emprim encunter ils Rapperswil Jona Lakers e suenter era encunter il SC Berna è il HCD ì sco victur dal plaz. La victoria encunter il SC Berna ha dentant custà forzas e gnerva.
Duas giadas cun dus gols en avantatg
La partenza en la partida encunter il SC Berna è grategiada al HCD tenor giavisch. Suenter l’emprim terz manava la squadra dal trenader Christian Wohlwend cun dus a nulla. En il segund terz ha il HCD dentant laschà vegnir ils giasts en la partida. Berna ha scursanì fin a la fin dal segund terz sin 2:3. En l'ultim terz è lura perfin gartegià al SC Berna d'egualisar il gieu. Il giuven Yannick Frehner ha dentant spendrà il HCD. Cun il 4:3 en la 56avla minuta ha el fatg cler tut e salvà il HCD uschia sur las rundas. Era sche Berna ha prendi il davos anc il goli or da sia chista na ha quai gidà nagut pli.
Pausa dals Gieus Olimpics
Pervia dal turnier olimpic fa la National League uss ina pausa da trais emnas. Pir ils 22 da favrer cuntinuescha puspè il campiunadi. Alura anc cun las davosas nov partidas da la qualificaziun.
Las ulteriuras partidas
- Zug – Ajoie 11:0
- Friburg-Gottéron – EHC Biel-Bienna 5:3
- Genevra-Servette – ZSC Lions 3:0
- SCL Tigers – HC Lugano 4:7
