Il club da hockey da Tavau ha duvrà in mument per vegnir en la partida encunter il HC Ajoie. Il punct da partenza era dentant cler: tut auter ch'ina victoria encunter la laterna cotschna da la liga fiss stà ina gronda surpraisa. Uschia ha il HCD l’emprim gì in pau fadia, forza era perquai ch'ils giugaders san che mintga punct quinta. En il cumbat per ina plazza da playoff directa èn anc trais equipas involvidas. Perfin Lugano ha anc la schanza da far il pass tranter las meglras sis equipas suenter la qualificaziun. Las schanzas da Lugano èn dentant las pli pitschnas.
Victoria per Tavau, dentant er per Genevra
Il Club da hockey da Tavau ha fat ses pensums. Dentant era Genevra, l’equipa dal Lac Lèman resta sin ils chaltgogns. Entant che il HCD ha batti Ajoie cler cun 3:0 ha Genevra victorisà il campiun EV Zug cun 4:0. Uschia che ils concurrents directs per ina plazza da playoff han omadus salvà lur puncts e lur schanzas. Che Tavau batta Ajoie na è segira betg ina surpraisa, er sche ins sto adina er gudagnar encunter in adversari che è sin il palpiri pli flaivel, che Genevra batta dentant il campiun actual e schon in zichel ina surpraisa.
Stagiun da Axel Simic è a fin
Il club da hockey da Tavau sto planisar il rest da la stagiun senza ses attatgader Axel Simic. El saja sa blessà vi dal schanugl, la mesemna passada en la partida a chasa cunter Bienna – e stoppia laschar operar. Tenor il club na po Simic betg pli dar questa primavaira.
I restan anc trais partidas
La qualificaziun è en la fasa finala, ed i na restan betg pli bleras schanzas per far tut cler. Il HCD dat anc trais partidas. Ils proxims adversaris èn Bienna, Langnau e sco ultima equipa anc Friburg Gottéron.
Ils ulteriurs resultats da la sonda saira:
- Lugano – Gottéron 5:2
- Ambri – Berna 3:2 suenter sajettar penaltis
- Genevra – Zug 4:0
- Lakers – Bienna 3:1
- SCL Tigers – ZSC Lions 1:4
