Igl è stà in da quests gieus nua che betg bler ha funcziunà tar il Club da hockey da Tavau. Sur 60 minutas èn ils ZSC Lions stads la meglra equipa. Er il resultat cler da 5:1 è in resultat giustifitgà.
Ils Grischuns n'han betg ditg peda da studegiar suenter a questa terrada pitra. Gia il glindesdi dat il HCD ordaifer cunter Lugano. Mesemna suonda il gieu a chasa cunter Zug e gievgia la partida ordaifer cunter Ajoie.
Emprim terz
- 7' Kyen Sopa (Marcus Krüger) 0:1
- 17' Sven Andrighetto 0:2
Il HCD n'è betg vegnì sin turas en l'emprim terz. Ils Turitgais parevan durant las emprimas 20 minutas pli alerts ed han uschia era sajettà meritadamain dus gols. Il segund gol è perfin crudà cura che Tavau giugava cun in giugader dapli. La statistica da sajets da 14:2 per ils ZSC Lions di atgnamain tut davart l'emprim terz.
Segund terz
- 35' Maxim Noreau (Justin Azevedo, Christian Marti) 0:3
Er en il segund terz ha Tavau gì bregias da crear acziuns offensivas. Ils ZSC Lions n'han betg fatg dapli che quai ch'i han stuì durant quest terz. Tuttina han els pudì auzar il resultat grazia ad in sajet davent da la lingia blaua. I n'è fin qua betg il gieu dal club da hockey da Tavau.
Ultim terz
- 41' John Quenneville (Marcus Krüger) 0:4
- 42' John Quenneville (Justin Azevedo) 0:5
- 52' Andres Ambühl (Dominik Egli, Raphael Prassl) 1:5
La partenza en l'ultim terz è stada miserabla per il HCD. Gist cun las emprimas duas acziuns offensivas han ils Lions auzà il resultat sin 5:0. Er en l'ultim terz èn las schanzas da gol stadas raras ord vista grischuna. Il sulet gol per Tavau è grategià ad Andres Ambühl en ina situaziun da powerplay. In pass envers il mez ha in defensur dal ZSC svià en l'agen gol.
