Siglir tar il cuntegn

Header

Gieu tranter Rapperswil e Tavau
Legenda: Keystone
cuntegn

National League Terrada cunter ils Lakers

Il Club da Hockey da Tavau perda a chasa cunter ils Rapperswil-Jona Lakers cun 0:2.

En il quart duel da la stagiun cunter ils Lakers hai dà per il HCD la segunda terrada. En in gieu cun occasiuns sin omaduas varts e dus fitg ferms golis han ils Lakers decis il gieu en l'ultim terz cun dus gols. Suenter 40 minutas stevi anc 0:0.

Suenter questa terrada è Tavau da nov sin plazza 6 da la tabella. L'avantatg sin il stritg è mumentan 12 puncts. ils Lakers èn vinavant sin plazza 3.

Emprim terz

  • Nagins gols

Ils aspectaturs han vis en las emprimas 20 minutas in gieu guliv cun plitost paucas schanzas da gol. Omaduas equipas han dà defensiv solid ed han pudì sa fidar sin golis fitg segirs. La meglra occasiun per il HCD ha Enzo Corvi gì en la 13avla minuta. El è sa mess atras encunter dus defensurs ed ha pudì ir persul envers il goli Melvin Nyffeler. Il goli dals Lakers ha dentant parà il sajet.

Segund terz

  • Nagins gols

Ils dus golis han procurà per la musica a Tavau. Sandro Aeschlimann (HCD) e Melvin Nyffeler (Lakers) han omadus mussà ina fitg ferma partida. Occasiuns da far gols han Tavau sco era Rapperswil gì en il segund terz. Ils dus golis han però mussà daco ch'els tutgan tar ils megliers golis da la liga.

Ultim terz

  • 48' Sandro Forrer 0:1
  • 60' Andrew Rowe 0:2

Fin en la 48avla minuta han ils aspectaturs stuì spetgar sin l'emprim gol. Sandro Forrer ha sajettà en avantatg ils da Son Gagl. En las ultimas minutas ha il HCD smatgà sin il 1:1, dentant senza success. Er in «powerplay» da tschintg cunter trais n'han ils Grischuns betg pudì nizzegiar. En l'ultima minuta han ils Lakers decis il gieu cun il segund gol.

RTR novitads 20:00

Artitgels legids il pli savens

Scrollar a sanestra Scrollar a dretga