La Svizra ha er pers la terza partida da la Nations League: Suenter la Tschechia ed il Portugal è er la Spagna stada memia ferma ed ha battì l'equipa da Murat Yakin a Genevra cun 0:1. Il sulet gol ha sajettà Pablo Sarabia suenter bunamain in quart d'ura. Surtut al cumenzament han ils Spagnols dominà ils Svizzers. Pli ditg ch'il gieu ha durà e meglier che l'equipa da Murat Yakin ha chattà ina via per sa metter cunter questa dominanza.
Uss haja num guardar enavant e star vidlonder, ha ditg Murat Yakin suenter la partida. Cun 0 puncts ord trais partidas è la Svizra sin il davos plaz da la gruppa. Sco proxim frunta la Svizra dumengia a chasa per la segunda giada sin il Portugal.
