Siglir tar il cuntegn

Header

cuntegn

Cursa da chasa Nevin Galmarini è puspè enavos en patria

Las cursas da la cuppa mundiala da snowboard a Scuol èn las cursas da chasa per il matador local, Nevin Galmarini.

Suenter ina operaziun dal dies, bleras uras reabilitaziun e fisioterapia è Nevin Galmarini puspè enavos sin las pistas da la cuppa mundiala da snowboard. En sasez vuleva il campiun olimpic dal 2018 turnar gia a Cortina d’Ampezzo en il circus da la cuppa mundiala. Per il comeback en las Dolomitas n’ha quai dentant betg tanschì. Persuenter ha il snowboardist da professiun anc gì in'emna peda. Il return è alura gartegià ils 17 da december tar las cursas da Carezza – quai perfin cun in resultat remartgabel. Nevin Galmarini ha terminà la cursa da comeback sin plaz set.

Enavos en patria

Gia per la quarta giada organisescha la regiun da Scuol cursas da la cuppa mundiala da snowboard. L’onn 2018 ha Nevin Galmarini festivà sin sia pista da chasa il pli grond success. Curt suenter ch’el aveva gudagnà il titel da campiun olimpic, è Galmarini vegni a Scuol terz ed ha uschia gudagnà il classament general da la cuppa mundiala da snowboard. Quella stagiun era il snowboardist dad Ardez il pli constant, il meglier dal mund.

audio
Nevin Galmarini enavos a Scuol
ord Actualitad dals 08.01.2021.
laschar ir. Durada: 2 minutas 42 Secundas.

Focus adina sin la proxima cursa, a lunga vista dentant sin ils Gieus Olimpics il 2022

Durant sia lunga fasa da return as ha Nevin Galmarini adina puspè motivà cun il siemi da vulair defender ses titel da campiun olimpic tar ils proxims gieus, l’onn 2022 a Beijing. En bun in onn s’entaupa l’elita dal sport d’enviern en China per ils proxims gieus olimpics. Alura vuless era Galmarini anc ina giada esser da la partida. E tgisà forsa garnir sia collecziun da medaglias cun ina ulteriura medaglia olimpica. Ina dad argient ed ina dad aur ha il sportist gia en sia collecziun.

RTR actualitad 07:00

Artitgels legids il pli savens