Cun ina festivitad finala e senza gronda agitaziun èn ils Gieus olimpics da giuvenils ids a fin la mesemna saira. La Svizra sco pajais ospitant ha surdà uffizialmain la bandiera olimpica a la Corea dal Sid, nua ch'ils proxims gieus d'enviern da giuvenils han lieu en quatter onns.
Durant las ultimas duas emnas èn 1'872 atlets ed atletas tranter 15 e 18 onns ord 70 pajais sa participads als gieus. Per l'emprima giada en l'istorgia olimpica èn sa participadas tuttina bleras atletas sco atlets.
E 640'000 aspectaturs ed aspectaturas han visità ils Gieus olimpics da giuvenils. Ord vista dals organisaturs è il concept cun entradas gratuitas uschia stà in success.
La Svizra gudogna 24 medaglias
Er Swiss Olympic tira in facit dal tuttafatg positiv e quai betg be pervi da las 24 medaglias ch'ils atlets e las atletas svizras han gudagnà. Surtut perquai che valurs olimpicas sajan vegnidas vividas sin tut ils nivels ed ils atlets e las atletas hajan uschia pudì ramassar impurtantas experientschas, saja la bilantscha fitg positiva, ha accentuà Corinne Staub, schef da missiun da la delegaziun dals 112 atlets e atletas da la Svizra.
Gieus da premiera en l'Africa
Ils proxims Gieus olimpics da giuvenils d'enviern han lieu il 2024 a Pyeongchang. Il 2018 èn stads là ils ultims Gieus olimpics d'enviern. Gia il 2022 han lieu a Dakar en la chapitala dal Senegal ils Gieus olimpics da giuvenils da stad. I sa tracta qua dals emprims Gieus olimpics insumma en l'Africa.
RTR actualitad 06:00
