Siglir tar il cuntegn

Naziunal/Internaziunal Il visier direcziun gieus olimpics 2018

Durant l’entira stad è vegnì trenà forza e cundiziun. Igl è er vegnì mulà vid la tecnica tant sin ils skis da passlung sco er en il stan da sajettar. E sa chapescha èn era vegnids fatg tests e tests da material. Ussa vegni dentant serius, ussa cumenza la nova stagiun da biatlon 2017/2018.

Serafin Wiestner
Legenda: La stagiun da biatlon 2017/2018 cumenza cun las emprimas cursas da la cuppa mundiala ad Östersund. Keystone

La stagiun da biatlon cumenza cun las emprimas cursas da la cuppa mundiala ad Östersund en Svezia.

Sin biatletas e biatlets spetga ina stagiun tut speziala cun il punct culminant, ils gieus olimpics il favrer a Pyeongchang en la Corea dal Sid. Il focus è cumplettamain sin quests gieus olimpics. L’emprim ston dentant mintgin dad els sa qualifitgar per astgar ir a Pyeongchang a la partenza.

Selina Gasparin
Legenda: Selina Gasparin - focus total vers Pyeongchang 2018. Keystone

5 biatletas e biatlets rumantschs

Actualmain figureschan gist tschintg biatletas e biatlets rumantschs en la cuppa mundiala. Sper las trais soras Selina, Elisa ed Aita Gasparin er Irene Cadurisch. Tar ils umens è Serafin Wiestner il sulet rumantsch. Tant Serafin Wiestner sco er la pioniera dal biatlon en Svizra, Selina Gasparin, èn commembers dal cader naziunal ed audan tar ils gronds trumfs.

Repeter il triumf dal 2014

La vita da Selina Gasparin è sa midada cumplettamain dapi il grond success als davos gieus olimpics il 2014 a Sotschi. La vicecampiunessa olimpica ha maridà, giu famiglia e lura è er il sport da biatlon sa midà cumplettamain. Durant che Selina trenava anc avant paucs onns insanua tar ella a chasa ora sin in prà e sajettava vid ina schiba montada vid in clavà han Selina Gasparin e collegas ussa cun l’arena da biatlon a Lantsch cundiziuns perfetgas per sa preparar sin la stagiun.

Suenter tants onns da biatlon poss jau dir ch’jau na sun anc mai stada sin in tal bun livel sco avant questa stagiun.
Autur: Selina Gasparinbiatleta

Selina Gasparin ha er ina nova buis ed ella ha mulà vid la tecnica da sajettar. Er corporal giaja fitg bain ed ella saja pronta per la nova stagiun da biatlon. Il siemi fissi sa chapescha da repeter il success da Sotschi il favrer a Pyeongchang.

Pass per pass direcziun podest

Sco Selina Gasparin ha er Serafin Wiestner trenà fitg sin la nova stagiun. El na saja mai stà malsaun e n’haja mai giu difficultads durant ils trenaments da stad. El haja er trenà bler individual tar el a chasa, savens er persul suenter ch’il frar giuven Till haja pendì la buis vid la paraid e terminà cun il sport da biatlon.

Serafin Wiestner
Legenda: Serafin Wiestner (27) da Trin. Sper Benjamin Weger il sulet biatlet svizzer en il cader naziunal. Keystone

Ina finamira saja dad esser pli constant durant l’entira stagiun ed uschia er vegnir pli datiers dal podest. In’ulteriura finamira saja da cuntanscher ina giada in plaz sut ils top tschintg cun la staffetta svizra e sa chapescha ils gieus olimpics da Pyeongchang. Quels sajan franc il non plus ultra da questa stagiun. Da la Corea dal Sid ha Serafin Wiestner en mintga cas bunas regurdientschas. Tar l’emprova generala la stagiun passada er’el vegnì setavel en il sprint.

Trio rumantsch davos Selina Gasparin

Davos Selina Gasparin cumbattan cun las duas soras Elisa ed Aita Gasparin e cun Irene Cadurisch trais ulteriuras biatletas rumantschas per puncts e podests. Quest trio ha dentant giu da magunar bain inqual frida il davos temp. Elisa Gasparin ha patì durant duas entiras stagiuns perquai ch’ella ha trenà memia bler. Ussa duai questa crisa dentant esser surmuntada.

Elisa, Aita e Selina Gasparin
Legenda: da san. Elisa (25), Aita (23) e Selina Gasparin (33). Keystone

Aita Gasparin, la sora giuvna, è vegnida franada l’entschatta da la stad. Durant bun dus mais ha la biatleta da 23 onns gì problems cun il venter. Tge che Aita ha propi gì n’han ils medis betg chattar ora. Ussa saja ella puspè frestga e sauna. Ma tuttina n’ha la giuvna da las soras Gasparin betg pudì sa qualifitgar per las emprimas cursas da la cuppa mundiala ad Östersund.

Irene Cadurisch
Legenda: Irene Cadurisch siemia dals gieus olimpics en la Corea dal Sid. Keystone

A la partenza ad Östersund è perencunter Irene Cadurisch. Franc ina surpraisa damai che la Bregagliotta ha manchentà quatter mais da la stagiun passada pervia d’ina greva blessura vid in schanugl. L’operaziun saja ida bain ed ussa saja el puspè fit e possia attatgar. Sco tut las autras siemia er Irene Cadurisch dals gieus olimpics. Gartegia cun las qualificaziuns è pussibel che gist quatter biatletas rumantschas pon ir a la partenza il favrer a Pyeongchang.

RR Sportissimo 17:00