Nino Schurter para dad esser en fitg buna furma en vista als gieus olimpics che cumenzan bainprest a Rio de Janeiro. Il Grischun ha gudagnà la cursa dals umens suenter in solo.
Sco gia avant in 'emna al campiunadi mundial a Nove Mesto en la Tschechia è Schurter sa distanzià baud da ses concurrents. Ils mountainbikers franzos Julien Absalon e Maxime Marotte han cumplettà il podest da la cursa da cup mundial a Lai. Markus Vogel ha cuntanschì sco segund meglier Svizzer il 6avel plaz.
Per Schurter è quai stà la terza victoria en la quarta cursa da la stagiun. Sulettamain la fin da matg è el vegnì quart a La Bresse suenter dus defects.
Podest per Jolanda Neff
Gudagnà la cursa da las dunnas ha la Svedaisa Jenny Rissveds. La campiunessa mundiala dal Danemarc, Annika Langvad suonda sin il segund plaz.
Jolanda Neff ha pers sin il curs pretensius da 4,2 kilometers lunghezza 1:30 minutas sin la victura.
Ditg n’eri betg cler, sche la ciclista da 23 onns possia insumma partir a Lai u betg. Ella ha mal il dies. Cun quai ha la campiunessa europeica actuala sa cuntentar cun l’otgavel plaz al campiunadi mundial en la Tschechia l’emna passada.
Segund meglra Svizra è vegnida Alessandra Keller sco 6avla. Per la Svedaisa Jenny Rissveds èsi stà l’emprima victoria en ina cursa dal cup mundial.
RR novitads 14:00
