A Marc Gianola è in crap dà giu da cor cura ch'el ha guardà la conferenza da medias dal Cussegl federal. Euforic na saja el dentant betg vegnì. Al CEO da Tavau è cler ch'i spetgia tuttina anc blera lavur sin il club.
La liga da hockey svizra ha preparà in concept da segirtad. Mascras vegnan ad esser obligatoricas en il stadion, plinavant vegnia er a dar mo plazs da seser. I saja dentant er anc da guardar sin blers detagls, declera il CEO da Tavau.
Vegn il concept approvà dastga il HCD laschar ir en il stadion radund 4'500 aspectaturs durant ils gieus da campiunadi. Quai tar ina capacitad da bun 6000 plazzas.
Per nus va il quint si sche nus pudain dar noss gieus da chasa cun 4'400 aspectaturs.
Sch'i dat pli pauc aspectaturs perdian els daners. Els hajan dentant reservas ed ils giugaders sajan er pronts da desister sin ina part da la paja.
Cunquai che las occurrenzas grondas èn pir lubidas davent dal cumenzament d'october èsi bain pussaivel ch'il campiunadi 2020/2021 entschaiva pir l'october e betg schon da mez settember.
Cuppa Spengler cun autras sfidas
Dals 26 fin ils 31 da december 2020 duess la 94avla ediziun da la Cuppa Spengler avair lieu. Er qua stat il HCD dentant anc avant inqual sfida. In zic mal il chau a Marc Gianola fa il fatg, che la Russia e la Finlanda èn actualmain sin la glista cotschna dals pajais da ristg. Clubs ord quests pajais na pudessan pia betg far il viadi en Svizra senza ir en quarantina. Qua veglian els guardar exact co la situaziun sa sviluppescha las proximas emnas. Ina decisiun definitiva sche la Cuppa Spengler vegn realisada il 2020 duessi dar l'october.
