L’epidemia da corona impedescha da manar tras quest onn il pli grond eveniment da sport en Svizra. A questa decisiun è vegnida l’Uniun Tour de Suisse ensemen cun tut ils partenaris pertutgads. Igl è l’emprima giada dapi la guerra mundiala ch’il Tour de Suisse na rolla betg tras la Svizra.
Spustar il Tour de Suisse sin in auter termin pli tard na saja betg stà pussibel per motivs logistics e finanzials. La finamira è ussa da pudair manar atras il Tour de Suisse 2021 sco planisà durant il mais da zercladur. Las etappas duain restar identicas sco quellas da quest onn, quai reduciss era la lavur, uschia l’organisaziun.
Quest onn avess il Tour de Suisse er fatg visita en il Grischun, concret en la regiun da Mustér/Sedrun. La sisavla etappa fiss ida a fin a Sedrun. Il di sisu fiss stada ina cursa cunter l'ura da Sedrun sur il Pass Alpsu fin ad Andermatt/Ursera.
