Per Pinturault èsi la terza victoria en seria en il slalom gigant. Gia ier era il Franzos il pli svelt skiunz al Chuenisbärgli.
Malgrà ch'i n'ha er la sonda dà nagina victoria per la Svizra ha la squadra svizra pudì persvader. Gist quatter skiunzs han fatg il pass tranter la top 10. Loïc Meillard ch'era suenter l'emprim percurs anc a la testa dal classament ha malgrà in grond sbagl en il segund percurs fatg il pass sin il podest.
Marco Odermatt, ch'aveva ier procurà per l'emprima plazza da podest al Chuenisbärgli dapi 13 onns en in slalom gigant, è vegnì a la fin cun 2 tschientavels retard sin il podest quart.
Classament:
- 1. Alexis Pinturault 2:18.36
- 2. Filip Zubcic +1.26
- 3. Loïc Meillard +1.65
Ils ulteriurs Svizzers
- 4. Marco Odermatt +1.67
- 7. Gino Caviezel +2.20
- 10. Justin Murisier +2.54
- 28. Cédric Noger +4.81
Il Grischun Gino Caviezel, ch'era ier crudà or suenter las emprimas portas, è vegnì a la fin 7avel.
Puspè in grev accident
Er tar il segund slalom gigant ad Adelboden hai dà in grev accident. L'American Tommy Ford ha curt avant l'arrivada pers la controlla sur dals skis ed è cupitgà en la rait da protecziun. L'American ha stuì vegnir transportà en l'ospital. La cursa è stada interruta per pliras minutas.
Gia ier era il giuven Norvegias Lucas Braathen cupitgà en l'arrivada ed ha donnegià ils lioms dal schanugl. El sto laschar operar e croda or per plirs mais.