Siglir tar il cuntegn

Header

video
Buemi wird im Qualifying zum E-Prix Bern Dritter
Or da Sport-Clip dals 22.06.2019.
laschar ir. Durada: 1 minuta 31 Secundas.
cuntegn

Sport d'auto Concurs en la furmla E

L’organisatura da las cursas da furmla E en Svizra è concurs e vegn schliada. Quai resulta d’ina notizia en il Fegl uffizial svizzer da commerzi. Tenor il SHAB ha la derschadra da concurs da Turitg avert ils 15 da schaner la procedura da concurs per la Swiss E-Prix Operations SA. Tenor quai è l'organisaziun schliada.

Ils problems finanzials da la firma han cumenzà suenter la cursa a Berna la stad passada. Ella n’haja betg chattà ina schliaziun cun ils crediturs principals – ha communitgà l’organisatura da las cursas sin dumonda da l’agentura da novitads Keystone-SDA. Davart ils daivets averts na datti naginas indicaziuns, damai che la procedura da concurs na saja anc betg terminada.

Nova firma gia pronta

Ils promoturs da cursas da la furmla E en Svizra na dattan betg si. Trais d'els, tranter quels Pascal Derron, hajan gia laschà registrar la nova firma Swiss E-Prix GmbH. Tenor il pledader sa tractia d'ina societad da salvament che saja en contact stretg cun intginas citads selecziunadas.

Fin uss hai dà en Svizra duas cursas cun autos da cursa electrics: 2018 a Turitg e 2019 a Berna.

Berna segirà

Betg pertutgada dal debachel da finanzas suenter la cursa 2019 è la citad da Berna. Ella ha ina garanzia da banca da la sponsura da titel, la banca Julius Bär. La citad da Berna ha gì custs da 650'000 francs.

Per tadlar curt e concis:

audio
Furmla E è bancrut
ord Actualitad dals 22.01.2020. Maletg: RTR
laschar ir. Durada: 1 minuta 6 Secundas.

RTR novitads 11:00

Artitgels legids il pli savens