Siglir tar il cuntegn

Header

Ils mountainbikers Nino Schurter e Lars Forster.
Legenda: Nino Schurter e Lars Forster a l'arrivada ad Arosa. mad
cuntegn

Swiss Epic Schurter e Forster restan a la testa

Nino Schurter e Lars Forster restan er suenter la segunda etappa dal Swiss Epic a la testa dal classament general. Il duo svizzer ha terminà l‘etappa sur 75 kilometers da Laax ad Arosa sin il segund plaz.

Ils dus favurits Nino Schurter e Lars Forster han pers en l’etappa da Laax ad Arosa 36 secundas sin ils victurs, Kristian Hynek e Martin Stosek da la Tschechia. En il classament general han ils Svizzers suenter duas da tschintg etappas in avantatg da 1:33 minutas sin l'Austriac Daniel Geismayr che parta ensemen cun il Tudestg Ben Zwiehoff. Sin il terz plaz cun in retard da 5:32 minutas suonda il duo talian cun Fabian Rabeinsteiner e Samuele Porro.

mountainbike
Legenda: Il Swiss Epic maina sin savens sin trails pulit pretensius. (mountainbike da Nino Schurter) RTR, Andreas Wieland

Favuritas n’èn betg da franar

Tar las dunnas han las favuritas – Annika Langvad dal Danemarc ensemen cun l‘Americana Haley Batten – era gudagnà la segunda etappa ed uschia defendì l’emprima posiziun. En il classament ha il duo Danais-American uss gia in avantatg da passa 15 minutas.

Annika Langvad
Legenda: Tegnair distanza e mascras - Er al Swiss Epic èsi da sa tegnair vid diversas perscripziuns. (dretg Annika Langvad dal Danemarc, la gronda favurita) RTR, Andreas Wieland

Sina Frei sto ceder

La meglra equipa svizra cun Sina Frei e Nicole Koller ha stuì dar si la cursa. Frei è cupitgada duas giadas durant l’emprima etappa a Laax. Tuttina vevi la finala tanschì per il segund plaz. Curt suenter la partenza da la segunda etappa ha la Turitgaisa dentant stuì dar si pervia da sias blessuras. Koller ha anc absolvì suletta la segunda etappa fin ad Arosa.

La gievgia spetga ad Arosa in‘etappa da 50 kilometers cun bunamain 2‘000 meters differenza d‘autezza.

RTR novitads 14:00

Artitgels legids il pli savens

Scrollar a sanestra Scrollar a dretga