La Swiss Football League metta pulit sin il chau il campiunadi da la Super League. Tar sia radunanza generala extraordinaria ha l’organisaziun decidì d’augmentar il dumber dals clubs che dattan en la Super League.
Ina segunda gronda midada è da sparter il campiunadi en pliras parts. Quel cumenza cun ina fasa primara da 32 rundas. L'emprim giogan las 12 equipas mintgamai duas giadas ina cunter l'autra, quai dat 22 rundas. Silsuenter vegn la liga spartida en duas gruppas, la Championship Group cun las meglras sis equipas e la Qualification Group da las equipas sin ils rangs 7 fin 12. En questas gruppas giogan las equipas anc mintgamai duas giadas ina cunter l'autra.
Uss vegnan ils playoffs
Silsuenter spetgan ils playoffs per eruir il campiun, ils participants a las concurrenzas europeicas e tgi che sto ir giu en la Challenge League. La meglra e la segund meglra equipa giogan en ina seria best-of-3 per il titel. Las quatter ulteriuras equipas da la Championship Group e las quatter meglras equipas da la Qualification Group cumbattan en trais rundas cun il sistem k.o. per ils plazs da las concurrenzas europeicas. En il quartfinal ed il mezfinal cun in emprim gieu ed in gieu da return, en il final cun ina suletta partida.
L'endischavel da la tabella suenter 32 rundas sa mesira en la barrascha cun il segund da la Challenge League. Il davos sto ir direct giu en la Challenge League.
La stagiun 2022/23 da la Super League vala anc il modus vegl, cun diesch equipas e las duas rundas d’atun respectivamain da primavaira.
