Las skiunzas ed ils skiunzs svizzers han survegnì mardi lur novs dress e lur nova vestgadira. A Dübendorf en la halla polivalenta han els dastgà ir per il nov material. Giaccas, chautschas, manetschas e stgarpas - insumma, tut quai ch'i dovra per la stagiun d’enviern.
La nova mandura ed il nov dress plaschan
La nova vestgadira da las skiunzas ed ils skiunzs svizzers è puspè cotschen. Vitiers vegnan tschertas parts en oransch, quai è la colur dal nov sponsur. En general plascha la nova mandura fitg bain a las skiunzas ed ils skiunzs - er il nov dress da cursa cun il num rumantsch «Levada» fa plaschair.
Di da material è culp da partenza
Il di da material è era in inscunter da famiglia ed il culp da partenza en la nova stagiun. I na capita betg uschè savens che tut ils cracks da skis passentan in di da cumpagnia, cun avair l’occasiun da discurrer er cun collegas ch'ins na vesa durant l’enviern betg uschè savens. Ed igl è il culp da partenza en vista en la nova stagiun: U è tut pront per ir a la chatscha da buns resultats sin pista.
