Ils skiunzs svizzers als gieus paralimpics en la China han manchentà plazs da medaglia en il super-G. En la categoria sin pe han Théo Gmür, Robin Cuche e Thomas Pfyl fatg ils plazs 5, 6 e 7.
Gmür a pers 2,2 secundas sin il campiun paralimpic indigen, Liang Jingyii. Per bronz til han mancà 1,29 secundas.
En la categoria sesenta era la Svizra represchentada cun dus atlets da moniski. Il tessinais Murat Pelit ha finì la cursa sin il 16avel rang. Pascal Christen è crudà or suenter passa 30 secundas.
Théo Gmür va per bronz en cursa rapida
Als gieus paralimpics en la China fa il skiunz svizzer Théo Gmür bronz – e procura uschia per l'emprima medaglia svizra. Avant quatter onns ha el fatg trais giadas aur en ils gieus da paralimpics. Pli sperts ch'il Vallesan èn stads en la cursa rapida, categoria en pe-sulet, il nov campiun Arthur Bauchet da la Frantscha, e l'Austriac Markus Salcher.
Il podest
- Arthur Bauchet (FRA), 1:14,92 minutas
- Markus Salcher (AUT), +0,33
- Théo Gmür (SUI), +1,25
Il segund svizzer, Robin Cuche da Neuchatel, è daventà 11avel cun in retard da 4,63 secundas.
Als paralimpics a Peking è la Svizra represchentada cun 12 atletas ed atlets. In dad els è Luca Tavasci da Samedan.
