Siglir tar il cuntegn

Header

video
La cursa da Luca Tavasci sur ils 12,5 kilometers
Or da Beijing 2022 Clips dals 12.03.2022.
laschar ir. Durada: 3 minutas 7 Secundas.
cuntegn

Passlung Luca Tavasci curra sin rang 13

Tar sia davosa partenza als gieus paralimpics en la China va Luca Tavasci sin plaz 13. En la cursa sur 12,5 kilometers stil liber perda il Samedrin passa 7 minutas sin il victur, il Chinais Wang Chenyang. Ina rangaziun en ils top 10 manchenta Tavasci per 1 minuta e 22 secundas. Il cumbat per aur è stà stretg. Il Chinais Wang è stà sulet 1,2 secundas pli spert ch'il Franzos Benjamin Daviet. Bronz ha fatg in ulteriur indigen, Cai Jiayun.

Sprint stil liber

Tar il sprint ha il passlunghist grischun Luca Tavasci manchentà da sa qualifitgar per ils mezfinals. Il Grischun da 28 onns ha fatg rang 16 en la qualificaziun. Radund 4 secundas han mancà per vegnir en il mezfinal. «Dapli n'è propi betg stà pussaivel», ha ditg Luca Tavasci envers SRF. Aur en il sprint stil liber da la categoria en pe ha fatg il Franzos Benjamin Daviet.

20 kilometers classic

Il passlunghist ha manchentà sur il 20 kilometers classic in diplom paralimpic. Il Grischun ch'ha fatg part da la categoria en pe ha absolvì il traject en 1:01:10,0. Gudagnà ha Taiki Kawayoke dal Giapun. Sin quel ha Tavasci pers radund 8 minutas. Argient e bronz èn ids al Chinais Cai Jiayun e Qiu Mingyang.

Per la segunda giada als paralimpics

Luca Tavasci ha 28 onns, el è da Samedan. El è naschì be cun in maun. El ha pia ina «aplasia», ses maun sanester n'è betg vegnì furmà en il stadi dad embrio. Per betg esser adina il davos tar las cursas ha el gia en scola cumenzà da far sport. L’emprim ha el cumenzà dad ir cun il velo, suenter ha el cumenzà da far passlung durant ils mais d’enviern. Actualmain è Luca Tavasci l’unic passlunghist svizzer cun handicap che va a la partenza da cursas da para sport ed era tar eveniments gronds, sco campiunadis mundials, u gieus olimpics – paralimpics.

audio
Luca Tavasci è arrivà bain a Peking
ord Actualitad dals 05.03.2022.
laschar ir. Durada: 1 minuta 52 Secundas.

Premiera a Pyeongchang, successiun a Peking

Sia premiera tar ils gieus paralimpics ha il sportist da Samedan gì tar ils paralimpics da Pyeongchang. Gia avant quatter onns era el a la partenza da la cursa olimpica. Uss, quatter onns pli tard, è el per la segunda giada da la partida tar uschè in eveniment. Ils paralimpics da Peking èn la gronda finamira dal sportist engiadinais. Per pudair sa preparar optimalmain sin quest eveniment ha Luca Tavasci, ch'è da professiun inschigner da fabrica, prendì in congedi. Uschia ha el fatg tut per savair mussar bunas prestaziuns a Peking.

audio
Paralympics: Luca Tavasci e sias ambiziuns
ord Actualitad dals 05.03.2022.
laschar ir. Durada: 2 minutas 50 Secundas.

Trais cursas entaifer sis dis

Ils paralimpics han cumenzà per Luca Tavasci cun la cursa sur 20 kilometers en il stil classic. Quai è la cursa preferida da l’Engiadinais. Be dus dis suenter l’emprima cursa spetga lura il sprint, e per finir anc la cursa media sur 12,5 kilometers en il stil liber. La finamira è da mussar durant las cursas il meglier pussaivel, lura ves’ins tge resultat che quai dat.

RTR actualitad 06:00

Artitgels legids il pli savens