Sco numer 803 e cun 16 onns era Roger Federer cumparì l'emprima giada en la rangaziun mundiala avant 25 onns. Pli tard è el lura stà durant 310 emnas sin il tron – in record che pir Novak Djokovic ha pudì rumper l'onn passà.
Ils ultims puncts che Federer ha anc gì sin ses conto, eran 600 puncts dal final da Wimbledon il 2019. Quai eran dapli ch'ils 360 puncts ch'el ha survegnì l'onn passà per il quartfinal ed han tuttina anc muntà per el plaz 97. Il victur da 20 titels da grand slam, planisescha in comeback suenter sia operaziun dal schanugl. El vul puspè dar il settember al Leaver Cup ed in mais pli tard lura als Swiss Indoors a Basilea.
Djokovic be pli numer 7
Il grond victur da Wimbledon è er il grond perdent sin la glista da rangaziun mundiala. Perquai ch'ins ha surdà nagins puncts, perquai che giugaders e giugadras da la Russia èn vegnids sclaus dal turnier, croda Novak Djokovic da plazza 3 enavos sin plazza 7. Profitader è exnum il giugader russ, Daniil Medwedew che resta a la testa da la tabella. Er l'adversari da Djokovic da la dumengia, Nick Kyrgios perda 5 plaz e croda da plaz 40 enavos sin 45.
Sulet Svizzer en ils top 100 è actualmain Henri Laaksonen, sco numer 96.
Golubic da 58 sin 100
La pli gronda perdenta tar las dunnas è la Svizra Viktorija Golubic. L'onn passà era ella vegnida en il quartfinal da Wimbledon. Uss croda ella da plazza 58 sin 100. Meglra Svizra resta Belinda Bencic ch'è sa meglierada per trais plazzas sin numer 13. Sin plazza 21 suonda Jil Teichmann. In sigl enavant ha pudì far Simona Waltert grazia a sia victoria ad Amersfoort, numnadamain da 186 sin 154.
Sco tar ils umens, na profiteschan er las dunnas betg a Wimbledon. La victura, Jelena Rybakina resta la numra 23. Sia contrahenta, Ons Jabeur è crudada da plaz 2 sin 5.
