Real Madrid ha gudagnà per la 14avla giada la Champions League. En il final a Paris ha Real battì Liverpool cun 1 a 0. Il gol decisiv ha fatg il Brasilian Vinicius en la 59avla minuta. Liverpool è bain stà la meglra equipa sin il plaz, dentant n`èsi betg reussì als Englais da nizzegiar lur schanzas. Quai cunzunt er pervi da las paradas dal goli da Real Madrid, Thibaut Courtois.
Ina seria da records
Per Real Madrid èsi il tschintgavel titel en la Champions League entaifer ils ultims otg onns. Sco gia en l’ultim final dal 2018 ha Real battì Liverpool. Per il trenader Carlo Ancelotti èsi il quart titel da la classa roiala – in nov record.
Gieu cumenzà cun retard
Il final da la Champions League ha cumenzà cun passa mes'ura retard. La raschun è ch'i ha dà problems a l'entrada. Numerus fans da Liverpool n'eran curt avant l'entschatta planisada oriundamain – numnadamain da las 9 – anc betg en lur plazs. Sco i para haja dà incidents perquai che fans senza bigliet hajan empruvà d'entrar.
