«Game, set, match». il Club da hockey da Tavau ha gudagnà per la 17avla giada la Cuppa Spengler, il turnier da chasa. En in final attractiv ha Tavau batti ils U.S. Collegiate Selects cun 6:3. Il HCD tegna uschia il record da victorias tar il turnier da chasa. Nagin’autra equipa ha gudagnà uschè savens il turnier prestigius sco Tavau. Sin plazza dus suonda il Team Canada cun 16 victorias.
Partida da siemi en il final
La partida da final era propi ina partida da siemi. Suenter sis dis e diesch partidas èsi vegni al duel da l’equipa da surpraisa dals Stadis Unids ed il patrun da chasa HCD. Questa constellaziun era in siemi per mintga fan da hockey. Ed er durant il final han las duas equipas fatg plaina onur a lur nums. Els han mussà ina partida da hockey sperta, attractiva e fitg egualisada. Pir durant las ultimas quatter minutas e mesa ha il HCD pudì far tut cler e gudagnar a la fin cun 6:3.
Buna reclama per la Cuppa Spengler
L’entir turnier, dentant surtut era la partida da final han fatg fitg buna reclama per il turnier che ha lieu dapi passa tschient onns, mintgamai l'ultima emna da l’onn. La qualitad da las equipas, il HCD sco campiun da record ed il temp tranter Nadal e Bumaun fan ora il mitus da la Cuppa Spengler. Ed uschia ha quella attratg ina giada dapli schurmas fans da hockey.
US Collegiate Selects cun hockey frestg
Per l’emprima giada ha giugà ina equipa da college, da la liga da scolas autas il turnier da la Cuppa Spengler. Ed ils US Collegiate Selects han persvadi fin en il final.
Gia dapi divers onns persequiteschan ils organisaturs da la Cuppa Spengler la liga da hockey da college. En l'America dal Nord dattan blers buns e talentads hockeyans en ina liga da college. Entras quai pon els cumbinar lur sport preferì cun in studi en ina da las numerusas scolas autas dals Stadis Unids. Ligas da sport da college datti per exempel tar il hockey ed era tar il american football. Dus sports tradiziunals da l'America dal nord.
L’equipa nordamericana ha ina media da vegliadetgna sut 22 onns. Ils Collegiate Selects èn la pli giuvna equipa che ha participà fin uss a la Cuppa Spengler. Grond era lura era l'interess co che l’equipa vegn a dar l’emprima partida encunter il Team Canada. Gia là ha la squadra persvadì e pers be stgars. Il grond «coup» è grategià lura a la squadra encunter il leader da la National League, il Club da hockey da Tavau. Cun hockey spert, frestg ed attractiv han ils US Colligiate Selects battì il grond favurit. Dapi lura è la squadra la gronda attracziun da questa Cuppa Spengler. La finala han els cuntanschì il final ed anc ina giada cumbattì cunter Tavau. Quella giada però cun ina fin a favur dals indigens.
Ils highlights dals gieus
Themen in diesem Newsticker
- Tavau gudogna la Cuppa Spengler
- Il HCD e Collegiate Selects stattan en il final
- Il HCD è sa qualifitgà per il mezfinal
- Per Canada è il turnier a fin
- Tavau batta Canada 4:1
- Fribourg-Gottéron gudogna 4:3 cunter Helsinki ed è en il mezfinal
- HCD perda cunter US Collegiate Selects cun 3:5
- Sparta Prag batta IFK Helsinki 4:1
- Team Canada cumenza cun ina stretga victoria
- Gottéron cumenza cun victoria suverana
Hockey plain emoziuns – la nova seria da RTR
🏆🏒 Focus, passiun, larmas – ed in siemi che daventa realitad. «Mission Pee Wee» accumpogna dus talents giuvens sin lur via en il Canada.
Sguard enavos: il 2023 festivescha la Cuppa Spengler ses 100avel anniversari
Avant 102 onns ha il medi Carl Spengler, figl dad Alexander Spengler che ha mess l’emprim crap da fundament dal lieu da cura a Tavau, fundà la Cuppa Spengler. Ses emprim intent è stà da sustegnair il club da hockey da Tavau, ma a medem temp er da reunir las naziuns ch'eran inimis tras l'Emprima Guerra mundiala cun contacts sportivs