Per il freeskier da Flem, Andri Ragettli, è la stagiun a fin. Tar sia cupitgada en il Big Air da mardi als campiunadis mundials ad Aspen è il Sursilvan sa blessà grevamain. Il giuven da 22 onns n'è betg stà capabel da bandunar l'arrivada sulet. Be paucs dis avant aveva el anc gudagnà aur en il slopestyle.
Tenor SwissSki han las emprimas controllas mussà che Ragettli è sa blessà vid il liom cruschà, il liom intern ed il meniscus dal schanugl sanester. El è sgulà la mesemna en Svizra, nua che la blessura vegn uss intercurrida pli exact.
Cursas da la cuppa mundiala datti quest onn anc en dus lieus – il final a Silvaplauna.
