Il final da la Champions League duai da nov avair lieu ils 28 da matg a Paris. Quai ha decis il comité executiv da l’UEFA. En sasez fiss il final stà a Son Petersburg en Russia. Pervi da l’invasiun en l’Ucraina ha la federaziun dentant ier retratg il final. En pli ha l’UEFA decis che tant las squadras naziunalas sco er clubs da la Russia e da l’Ucraina stoppian giugar lur partidas internaziunalas sin terren neutral.
Team svizzer da skicross ed aerials desista d'ir en Russia
- L'equipa da skicross svizra desista da la cuppa mundiala da questa fin d'emna en il Sunny Valley da la Russia. Quai ha Swiss-Ski declerà gievgia saira sin Twitter.
- Er l'equipa dals aerials na vegn betg a far part da la cuppa mundiala a Jaroslawl. Questas decisiuns ha Swiss-Ski prendì pervi dals svilups en il conflict cun l'Ucraina.
- La FIS na vul entant betg desister dals turniers en Russia.
Pervi dal conflict cun l'Ucraina che sa pegiurescha, desistan ils sportists svizzers sin ils turniers da la fin d'emna en Russia. Il victur d'olimpia Ryan Regez e ses collegas da team turnan pia enavos en Svizra, hai gì num en ina communicaziun. Avant che la stagiun va a fin a Veysonnaz cun il final, ils 19 da mars, èn ils Svizzers pia be anc ils 11 fin il 13 da mars en Austria sin la Reiteralm.
Er betg da la partida al start en Russia è l'equipa dals aerials svizra. Lez desistan uschia dals cumbats en la cuppa mundiala da la fin d'emna. Suenter ils gieus olimpics eran omaduas equipas viagiadas directamain da la China en Russia, ed uschia anc avant l'escalaziun tranter la Russia e l'Ucraina. Ils turniers dals aerials han lieu a Jaroslawl, 280 kilometers en il nord da Moscau.
FIS na vul betg desister da cursas en Russia
Avant la Svizra avevan er gia las federaziuns da skis da l'Austria e da la Germania declerà da far turnar lur equipas ord la Russia. Sco la federaziun tudestga ha annunzià, na vegnian ins entant a far part da naginas occurrenzas internaziunalas en Russia u l'Ucraina.
La Federaziun internaziunala da skis, FIS, na vul per il mument dentant betg desister dals turniers en Russia. Omaduas regiuns na sajan betg pertutgadas dal conflict tranter la Russia e l'Ucraina, ins observia dentant vinavant fitg stretg la situaziun per pudair garantir la segirezza dals atlets e las atletas.
