Il sulet gol en quest gieu ha fatg Willy Riedi en la 48avla minuta. El ha devià in sajet da Christian Marti davent da la lingia blaua. Nagina schanza n'ha gì il goli da Tavau, Sandro Aeschlimann. Al HCD n’èsi betg reussì da sajettar in sulet gol en quest gieu. Per l’ina ha la precisiun mancà avant il gol – e per l’autra ha il goli dals ZSC Lions, il Tschec Simon Hrubec, danovamain persvadì dad A fin Z.
L’entira seria encunter ils ZSC Lions è stada fitg stretga, la finala han mo detagls decidì a favur dal favurit, che vul gudagnar per la 10avla giada il titel da campiun svizzer. La davosa giada ch’ils ZSC Lions han triumfà è stà il 2018. Il HCD, il campiun svizzer da record, sto uschia avair vinavant pazienza. Il davos titel ha l’equipa grischuna gudagnà il 2015. Lura aveva il HCD battì en il final ils ZSC Lions.
4. GIEU: HCD perda en la segunda prolungaziun
Davent da l’entschatta era il quart gieu dal HCD encunter ils ZSC Lions ina chaussa stretga. L’emprim è il HCD vegnì meglier en il gieu. Ins ha vis ch'il HCD vul revantscha per la sconfitta cunter ils ZSC Lions a Turitg. Lura dentant ha il HCD pers pervia dad in check Joakim Nordström. Gia baud en la partida ha Nordström stuì bandunar il glatsch. L’attatgader svedais na è betg pli turnà en il gieu. Quai ha segira procurà per ina tscherta malsegirezza tar ils giugaders dal HCD. L’equipa grischuna ha dentant tuttina empruvà da restar concentrada.
Suenter ha l’equipa alura pli e pli er pers la controlla dal gieu ed uschia èn ils ZSC Lions vegnids meglier en il gieu. Vi e pli ha ins gì il sentiment ch'ils ZSC Lions vegnan a far l’emprim gol. Ed uschia è quai er capità. Willy Riedi è stà quel che ha battì Sandro Aeschlimann en il gol dal HCD per l’emprima giada. Uschia ha il HCD stuì currer suenter er en la quarta partida ad in retard. Curt avant la fin dal segund terz ha il HCD alura marcà il pari dal 1:1. Gest dus giugaders da l’equipa turitgaisa eran sin il banc da chastids e quai ha il HCD nizzegià per far il pari.
Puspè èn ils ZSC Lions ids en avantatg. Fin curt avant la fin dal temp regular manava l’equipa da la Bassa. Pir lura è il HCD anc ina giada stà bun dad egualisar il gieu. Leon Bristedt ha fatg il pari da 2:2. E cun quel è quai ì en l’emprima prolungaziun. Omaduas equipas han gì schanzas. Nagina ha dentant fatg il gol. Quel è alura pir crudà en la segunda prolungaziun suenter 84:14 minutas ha Sven Andrighetto terminà cun ses gol il gieu. Il HCD sto uss gudagnar ils proxims gieus, cas cuntrari e la stagiun per l’equipa grischuna a fin.
3. GIEU: Tavau perda danovamain a Turitg
Il gieu n’ha betg cumenzà optimal per ils Grischuns. Durant las emprimas 10 minutas ha il HCD stuì dar otg minutas cun in giugader pli pauc. Suenter quest’unda da chastis è Tavau vegnì meglier e meglier en il gieu e curt avant l’emprima pausa ha Marc Wieser sajettà en avantatg il HCD ord curta distanza.
En il segund terz è marschà pauc durant las emprimas minutas. Cun il temp ha l’equipa da chasa dentant surpiglià pli e pli fitg la batgetta dal gieu. Entaifer sis minutas han ils Turitgais fatg ord in 0:1 in 3:1. Sco emprim Alexandre Texier ch'ha egualisà, lura Sven Andrighetto che ha sajettà en powerplay il 2:1 e mo paucas secundas pli tard ha Dean Kukan auzà il resultat.
En l’ultim terz han ils Grischun empruvà da dar in zic pli dir, offensiv è dentant vegnì pauc. In pau ord il nagut ha Joakin Nordström anc sajettà il 2:3 ord vista dal HCD. En las ultimas minutas han ils Lions mussà lur rutina e denfedì lur avantatg.
Tavau ha sur gronda part dal gieu dà memia passiv per gudagnar ordaifer encunter il «Zett». Vitiers vegn, ch'els han fatg grev la vita a sasez cun 10 chastis da duas minutas.
2. GIEU: Cun engaschi e disciplina tar la victoria
Il HCD gudogna il segund gieu da la seria da quartfinal cun 2:1. Omadus gols sajetta Tavau en powerplay.
Per l’emprima giada insumma en questa stagiun vegn il Club da hockey da Tavau da gudagnar encunter ils ZSC Lions. En ils quatter gieus da la qualificaziun sco er en l’emprim duel da playoff vevi mintgamai dà ina terrada. Insumma èsi pir la segunda victoria dal HCD encunter ils ZSC Lions en ils davos 19 duels da las davosas quatter stagiuns.
Cumenzà n’ha il gieu insumma betg tenor il gust dal HCD. En la 13avla minuta èsi reussì a Justin Azevedo da manar ils Turitgais en avantatg. Per in mument n’ha il HCD betg laschà adatg avunda ed Azevedo ha pudì ir tut persuls vers il gol dal HCD. L’attatgader canadais-portugais n’ha la finala laschà nagina schanza al goli dal HCD, Sandro Aeschlimann. Curt avant l’emprima sirena, en la 19avla minuta, ha Michael Fora lura pudì egualisar per il HCD al 1:1 entras in gol da powerplay. En la 39avla minuta ha Tavau danovamain nizzegià ina situaziun da powerplay. Matej Stransky ha cun in sajet da distanza pudì manar l’equipa da chasa per l’emprima giada en avantatg. En il davos terz ha il HCD, che vegn trenà dal Finlandais Waltteri Immonen e lur assistent canadais Glen Metropolit, controllà il gieu e tegnì quest resultat fin la fin.
Gia la dumengia, ils 19 da mars a las 20:00 uras, spetga gia il proxim duel tranter ils ZSC Lions ed il HCD, lura puspè en il stadion nov a Turitg.
Ils resultats dals playoffs quartfinal:
- HCD – ZSC Lions 2:1 (seria 1:1)
- HC Lugano – Genevra Servette 2:0 (seria 1:1)
- SC Berna – EHC Bienna 2:4 (seria 0:2)
- EV Zug – Rapperswil-Jona Lakers 4:3 (seria 2:0)
1. GIEU: Il powerplay ha decidì a favur dals Lions
Per il Club da hockey da Tavau n’han ils playoffs betg cumenzà sco giavischà. Il HCD ha pers l’emprim duel da playoff quartfinal ordaifer encunter ils ZSC Lions cun 1:4. Turitg maina uschia la seria da best-of-seven cun 1:0.
Per la differenza en quest emprim duel ha il powerplay procurà. Dus dals quatter gols han ils Lions sajettà cun in giugader dapli sin il glatsch, quai mintgamai en il segund terz. Ed er tar l’emprim gol da Turitg en la 5avla minuta era Simon Knak dal HCD gist enavos dal banc da chasti, ils Lions dentant anc en la furmaziun da powerplay. Per la decisiun ha il topscorer dals Lions, il Finlandais Juho Lammikko, procurà cun il 4:1 en la 47avla minuta. Il sulet gol dal HCD ha Marc Wieser fatg. L’attatgader ha svià in sajet da Dennis Rasmussen cun il pèz en il gol dals Lions al 1:1 en la 15avla minuta.
La schanza da far revantscha ed egualisar questa seria da playoff quartfinal ha il HCD gia il venderdi saira a las 20:00 a Tavau.
Ils resultats dals playoffs quartfinal:
- ZSC Lions – HCD 4:1 (seria 1:0)
- Genevra Servette – HC Lugano 6:3 (seria 1:0)
- EHC Bienna – SC Berna 3:0 (seria 1:0)
- Rapperswil-Jona Lakers – EV Zug 2:5 (seria 0:1)
La statistica discurra per Turitg
Turitg encunter Tavau, tenor la qualificaziun atgnamain il pli stretg duel da quartfinal. Igl è l’inscunter tranter il quart ed il tschintgavel da la tabella. Las cifras discurran però cleramain per ils ZSC Lions che valan propi sco l’adversari da sgarschur per il HCD.
Ils ZSC Lions han gudagnà 16 dals davos 17 duels cun il HCD. Ditg auter; durant las davosas quatter stagiuns han ils Grischuns battì sulettamain ina suletta giada ils Turitgais. Ma la davosa giada che questas duas equipas èn s’inscuntradas en ils playoffs è gia otg onns enavos. Il 2015 èn ils Lions ed il HCD sa duellads en il final. Malgrà che Turitg aveva gudagnà l’emprim gieu è il HCD daventà campiun svizzer cun quatter victorias en seria. Igl è stà il davos titel per l’equipa da Tavau.
Sa zuppar da Turitg na sto il HCD però betg en questa stagiun. Tavau ha mussà il davos onn grondas qualitads. Nagin’autra equipa ha per exempel gudagnà dapli gieus suenter esser stà en dischavantatg. Talas qualitads ha Tavau er gia mussà en ils playoffs da quartfinal avant in onn cun eliminar ils Rapperswil-Jona Lakers suenter avair pers ils emprims trais gieus.
Ils duels directs durant la qualificaziun 2022/2023:
- 29-10-2022: HCD – ZSC Lions 0:5
- 19-11-2022: ZSC Lions – HCD 4:3 suenter penaltis
- 04-12-2022: HCD – ZSC Lions 1:4
- 02-03-2023: ZSC Lions – HCD 4:1
