Siglir tar il cuntegn

Header

video
Zug è vinavant en il final dals playoffs
Or da Sport-Clip dals 14.04.2022.
abspielen. Laufzeit 4 minutas 47 Sekunden.
cuntegn

Playoff mezfinal Per il HCD è la stagiun a fin

Tavau perda er il quart gieu da la seria da mezfinal cunter Zug e perda uschia la seria cun 0:4. Il topscorer da Zug Jan Kovar ha decis il gieu cun ses gol suenter 45 secundas en la prolungaziun. Fin 18 secundas avant la fin vesevi anc ora suenter l'emprima victoria per il HCD en questa seria.

audio
La stagiun da hockey è a fin per il HCD
aus Actualitad vom 15.04.2022.
abspielen. Laufzeit 2 minutas 8 Sekunden.

Tavau ha mussà davent da l’emprima minuta ch’i na vulan betg gia ir en vacanzas. Els han empruvà da far squitsch sin il gol da Zug. L’equipa da la svizra centrala ha dentant mussà sia rutina e n’ha betg schà stermentà da quai. Uschia è l’emprim terz stà fitg gulivs. Sulettamain en in powerplay da Zug èsi propi vegnì malsegir avant in dils dus gols.

En il segund terz ha Zug gì dapli dal gieu ed uschia era dapli occasiuns da gol. Sco uschè savens durant questa stagiun ha il goli Sandro Aeschlimann dentant puspè mussà paradas miraculusas. Auter il HCD. Il defensur Thomas Wellinger ha nezzegià ina da las paucas occasiuns da gol e sajetà en la 38avla minuta igl 1:0.

En l’ultim terz ha Zug smatgà sin il 1:1, ditg n’ha quei dentant betg vulì funcziunar. Tavau ha defendì cun blera passiun ed ha pir incassà il gol 18 secundas avant la fin dal temp regular. En la prolungaziun hai lu mo cuzzà 45 secundas fin ch'il topscrer Jan Kovar ha sajetà il 2:1 per Zug ed uschia mess ina fin sin la stagiun dal HCD.

video
Wohlwend: «Pudain esser loschs»
Or da Sport-Clip dals 14.04.2022.
abspielen. Laufzeit 3 minutas 17 Sekunden.

3. gieu: Zug gudogna era il terz gieu da la seria

Il success da l’EV Zug e pli che merità. L’equipa cun il defensur rumantsch Claudio Cadonau ha per gronda part dominà il gieu e gì bleras schanzas da decider gia baud il gieu. Il goli dal HCD, Sandro Aeschlimann, ha dentant tegnì sia equipa en il gieu, quai per part cun paradas miraculusas, sco gia bain savens en questa stagiun.

video
Zug batta il HCD per la segunda giada encunter nulla
Or da Sport-Clip dals 12.04.2022.
abspielen. Laufzeit 6 minutas 41 Sekunden.

Per la decisiun ha procurà Yannick Zehnder cun il 2:0 en la 45avla minuta. L’emprim gol aveva Zug sajettà gia en la 6avla minuta entras Dario Allenspach ed uschia procurà gia baud per ina duscha fraida per l’equipa grischuna. Il davos gol per Zug, il 3:0, è crudà 1,5 secundas avant la fin dal gieu entras Sven Leuenberger cun in sajet da davos en il gol vid, cura ch'il HCD aveva remplazzà il goli Aeschlimann cun in 6avel giugader.

Ord vista da Zug in success ch'i vala da trair vinavant ed el ha er sco rumantsch e grischun nagina cumpassiun cun Tavau en quest mument. L'intervista cun Claudio Cadonau:

audio
Claudio Cadonau: «I marscha per il mument»
aus RTR Audio vom 13.04.2022.
abspielen. Laufzeit 2 minutas 22 Sekunden.

Datti in segund miracul per il HCD?

Sco gia en la seria da playoff quartfinal è il HCD enavos en la seria cun 0:3. Encunter ils Lakers ha l’equipa da Christian Wohlwend pudì mussar gronda morala ed anc pudì volver la seria. Encunter l’EV Zug na vegn quai però betg simpel. Ils da Zug persvadan il mument dad A fin Z ed han uss gudagnà set gieus da playoff en seria. Plinavant n’èsi anc mai reussì ad in’equipa da volver ina seria da mezfinal suenter in 0:3.

Il proxim duel tranter il HCD e l’EV Zug è la gievgia saira, ils 14 d’avrigl a las 20:00 uras a Tavau.

Wohlwend mitscha cun in chasti

La cumissiun disciplinara da Swiss Ice Hockey ha chastià il trenader dal HCD, Christian Wohlwend, cun 4'400 francs per ses cumportament nunsportiv a la fin dal segund gieu da playoff mezfinal a chasa encunter l’EV Zug. Uschia dastga Wohlwend puspè esser a la banda durant il terz gieu a Zug.

video
Müller tutga al 2:1 – Wohlwend flippa ora
Or da Sport-Clip dals 10.04.2022.
abspielen. Laufzeit 6 minutas 22 Sekunden.

Christian Wohlwend aveva survegnì en il davos gieu in chasti disciplinar suenter avair bittà gist trais buttiglias sin il glatsch, quai suenter che Zug aveva tutgà be 15 secundas avant la fin dal gieu al 2:1 ed uschia decidì il gieu. La raschun che Wohlwend ha pers sia controlla è stà in chasti dispitaivel da duas minutas encunter il defensur da Tavau, Jesse Zgraggen.

2. gieu: Tavau perda gieu dramatic

Il HCD perda il segund gieu da la seria cun 1:2 ed è uschia en la seria cun 0:2 en retard. Il gol decisiv ha Zug pir sajettà 15 secundas avant la fin.

Il gieu ha cumenzà perfetg per il HCD. Gia suenter bun 1 minuta ha Enzo Corvi sajettà en avantatg sia equipa. Quai sin pass da Marc Wieser. Grazia ad in ferm Sandro Aeschlimann en il gol ha Tavau defendì quest avantatg durant las emprimas 20 minutas. En il powerplay ha il defensur svedais, Christian Djoos egualisà en la 26avla minuta. En il segund terz han ils Grischuns gì fadia d’insumma vegnir tar bunas occasiuns, uschia ch’igl è ì cun in 1:1 en l’ultim terz.

Là han las duas equipas ditg neutralisà ina l’autra. Tavau sco er Zug han persvas cun ina ferma defensiva. La situaziun decisiva è lura succedida duas minutas avant la fin. Jesse Zgraggen ha survegnì in chasti dispitaivel da duas minutas. Suenter che Leonardo Genoni ha bloccà il puck, ha el anc furà suenter levet. Ch'ils arbiters han dà per quest'acziun in chasti è ina dira decisiun ord vista dal HCD. Zug ha nizzegià quai e sajettà 15 secundas avant la fin il 2:1 entras Marco Müller.

video
Enzo Corvi davart las minutas dramaticas a la fin dal gieu
Or da Sport-Clip dals 10.04.2022.
abspielen. Laufzeit 1 minuta 18 Sekunden.

La schanza da recaltgar l'emprima victoria en questa seria survegn il HCD mardi saira a las 20:00. Lura vegni tar il terz gieu.




1. gieu: EVZ memia ferm per Tavau

Il Club da hockey ha Tavau ha pers l'emprim duel da playoff mezfinal encunter il favurit e defensur dal titel, l'EV Zug, ordaifer cun 0:3. L'equipa da la Svizra Centrala maina uschia er la seria da «best-of-seven» cun 1:0.

Per la decisiun ha il chapitani Jan Kovar procurà cun il 2:0 en la 50avla minuta. Il Tschec aveva gia dà il pass tar il 1:0 en la 25avla minuta entras Christian Djoos. Fin quest emprim gol ha l’equipa da chasa dominà il gieu e gì schanzas tut a dubel. Mo il goli Sandro Aeschlimann ha cun sias paradas miraculusas tegnì il HCD en il gieu. En la davosa minuta, cura ch’il HCD ha mess tut sin ina charta e remplazzà il goli cun in ulteriur giugader, ha Sven Senteler tutgà en il gol vid al 3:0. L’equipa da Christian Wohlwend ha cumbattì fin la fin, ma i n’è betg reussì da sajettar in gol en quest emprim duel cun l’EV Zug.

La schanza da far meglier ed egualisar la seria survegn il HCD gia la dumengia saira a las 20:00. Lura vegni tar il segund duel a Tavau.

Prevista EVZ – HCD ubain favurit - campiun da record

En la seria da playoff mezfinal gioga il Club da hockey da Tavau cunter l’EV Zug. Entant ch’ils da Zug èn marschads senza problems en quest mezfinal, ha il HCD stuì cumbatter sur set gieus. Sin il palpiri è l’equipa da la Svizra Centrala il grond favurit.

Bler temp da sa revegnir n’han ils da Tavau betg gì suenter la seria da quartfinal cunter ils Rapperswil-Jona Lakers. Be dus dis suenter il davos gieu spetga cun l’EV Zug il grond favurit sin il titel da campiun svizzer. Zug ha gudagnà la qualificaziun ed ha gudagnà en questa stagiun 3 da 4 duels cunter il HCD ed en il quartfinal laschà nagina schanza al HC Lugano. Per il HCD pia in grond obstachel sin via en il final dals playoffs 2021/22.

audio
Discurs: Il HCD cumbatta sin il glatsch ma era cun las finanzas
aus Actualitad vom 08.04.2022.
abspielen. Laufzeit 2 minutas 53 Sekunden.

Ils duels directs da la stagiun 2021/22:

Avrir la box Serrar la box
  • 07-09-2021: EV Zug – HCD 5:2
  • 16-11-2021: HCD – EV Zug 2:0
  • 22-12-2021: HCD – EV Zug 1:2
  • 04-03-2022: EV Zug – HCD 7:2

Tge pleda per tgi?

  • Per Tavau: Il HCD ha duvrà in pitschen miracul per sa qualifitgar per il mezfinal. Encunter ils Lakers eran ils Grischuns enavos en la seria cun 0:3 ed uschia cun in pe en vacanzas. Tavau ha a la fin però gudagnà il crimi – e quai è ina gronda motivaziun ed ha ina gronda valur per la morala dal campiun svizzer da record.
  • Per Zug: Il victur da la qualificaziun ha actualmain il pli ferm cader. Quai han ils da Zug er demonstrà en il quartfinal cunter Lugano. Zug è il defensur dal titel ed il grond favurit, er grazia al goli Leonardo Genoni (anteriur goli dal HCD).

Plan e datas dals gieus

Avrir la box Serrar la box

Il mezfinal da playoff vegn giugà il modus «Best of 7». Pia: Quella squadra che gudogna sco emprima 4 gieus sa qualifitgescha per il final.

  • 08.04.2022: EV Zug vs. HCD
  • 10.04.2022: HCD vs. EV Zug
  • 12.04.2022: EV Zug vs. HCD
  • 14.04.2022: HCD vs. EV Zug
  • 16.04.2022: EV Zug vs. HCD*
  • 18.04.2022: HCD vs. EV Zug*
  • 20.04.2022: EV Zug vs. HCD*

* han mo lieu, sch'ina squadra n'ha anc betg gudagnà quatter giadas.

audio
Per tadlar: Curt e cumpact
aus RTR Audio vom 11.04.2022.
abspielen. Laufzeit 1 minuta 2 Sekunden.

RTR actualitad 17:00

Artitgels legids il pli savens

Scrollar a sanestra Scrollar a dretga