Gieu 7: Losanna 3:0 HCD
Las premissas per il Club da Hockey da Tavau eran nauschas davent da l’entschatta. Per la setavla e decisiva partida da quartfinal cunter Losanna mancavan puspè otg giugaders da tschep. Uschia era il trenader dal HCD Josh Holden sfurzà da nominar en il quart bloc per l’emprima giada Lars Steiner. Quel ha be 16 onns. Malgrà ch'il HCD è il spezialist absolut sch'i va per gudagnar l’ultima e decisiva partida dad ina seria da playoff – il HCD aveva gudagnà fin da qua nov da diesch partidas decisivas – era la lezia davent da l’entschatta difficila. Difficila era la situaziun era per Losanna, uschia che l’entschatta da la partida era dominada da questa malsegirezza. Suenter in pèr minutas è lura Losanna vegnì meglier en il gieu. Silsuenter è sa prestà il defensur dal HCD Sven Jung in check envers Antti Suomela per il qual el è vegnì tramess en la gardaroba. Era Suomela ha da bandunar il glatsch ed i dat tschintg minutas powerplay per Losanna. Questa fasa surviva il Club da Hockey da Tavau senza cuntragol. Quel capita alura dentant gist suenter. Losanna maina cun 1:0. E cun quest resultat va la partida en l’emprima pausa.
Sven Jung, il defensur dal HCD pia sut la duscha, ed uschia ha il HCD da defender be pli cun trais blocs. Sut questas circumstanzas vegn la missiun per il Club da Hockey da Tavau anc pli greva. Ed uschia èsi puspè Losanna che fa gist a l'entschatta dal segund terz il 2:0. Il pli tard uss èsi cler a tuts, questa saira vegn fitg, fitg, difficila per Tavau, vul la squadra grischuna anc volver la partida e turnar en il gieu. Il HCD ha bain ina u l’autra schanza, i na gartegia dentant betg da far in gol. Suenter dus terzs maina l’equipa da chasa cun 2:0.
Avant il davos terz pon ins sa dumandar sche il HCD chatta anc la furmla magica per tuttina volver la partida. Gia suenter las emprimas minutas èsi cler che quai na vegn betg pli a capitar. Pli ditg ch'il gieu dura e pli pauc ha l’equipa cret vi da la pussaivladad da tuttina anc gudagnar questa partida decisiva. Trais minutas avant la fin ha il trenader Josh Holden prendì ses davos timeout da la stagiun. El ha anc ina giada empruvà da declerar a ses giugaders co el vul ch'i vegnia giugà. Holden ha prendì il goli Sandro Aeschlimann or dal gol. Tut n'ha dentant gidà nagut pli. Losanna ha anc fatg il 3:0 ed uschia procurà per la decisiun. Per il HCD è la stagiun uschia a fin. L’equipa grischuna perda la seria da quartfinal cun 3:4 cunter Losanna. L’equipa da la Svizra romanda avanza en il mezfinal e frunta là sin Friburg.
Gieu 6: HCD 2:5 Losanna
Davent da l’entschatta han ins sentì l’impurtanza dal gieu. Las duas equipas as han neutralisà per gronda part. En l’emprima fasa dal gieu èn vegnids paucs tirs sin ils gols. Lura dentant ha il HCD tschappà in chasti e Losanna ha pudì giugar powerplay. E Losanna ha nizzegià questa situaziun da powerplay. En la setavla minuta ha Antti Suomela fatg il 0:1. E l’equipa da la Svizra romanda ha cuntinuà a far squitsch. Gnanca trais minutas suenter ha Losanna augmentà l’avantatg sin 0:2. Il HCD ha empruvà da reagir. Quai è gartegià durant l’emprima situaziun da powerplay nua che Leon Bristedt scursanescha sin 1:2. Puspè è tut avert.
Il segund terz ha il HCD da cumenzar cun in giugader pli pauc sin il glatsch. Pervia dad in chasti sto Yannick Frehner mirar tiers las emprimas duas minutas. Il HCD ha surventschì questa fasa senza ulteriur gol. Dentant pauc suenter dumogna l’equipa da la Svizra romanda tuttina dad augmentar l’avantatg. Puspè Antti Suomela cun il 1:3. Per l’emprima giada han ins il sentiment ch'i mancan uss propi las forzas al Club da hockey da Tavau. L’equipa grischuna emprova da far insatge, puspè èsi dentant Losanna che marchescha il gol. Per la terza giada durant quest gieu tutga Antti Suomela. Suenter la mesadad da la partida statti 1:4. En questa situaziun piglia il trenader dal HCD, Josh Holden, ses Timeout. Tgi sa sch’el porta insatge? Il cuntrari è il cas. Losanna augmenta curt suenter sin 1:5. Ed il HCD mida il goli. Per Sandro Aeschlimann vegn Gilles Senn. Vi dal resultat na mida nagut pli. Cun trais cuntergols en il segund terz vegn il HCD tramess en la gardaroba.
Tegnair il donn en in rom acceptabel, quai era la devisa dal Club da hockey da Tavau durant il davos terz. Suenter ils trais cuntergols en il segund terz era il gieu en sasez gia decidì. A tuts era cler ch'il HCD na riva betg pli da storscher quest gieu, era cun tutta voluntad da l’equipa da chasa betg. Uschia è quai anc ì per metter in u l’auter accent per mussar a Losanna ch'ins è anc adina qua e ch'ins n'ha betg scrit giu la victoria da la seria. Tavau ha pudì far il davos anc in zichel cosmetica da resultat. Leo Bristedt ha tutgà in penalti. Uschia vegni la sonda saira a la setavla partida en questa seria. Sin las duas equipas spetga l'uschenumnada ‘Belle’.
Gieu 5: Losanna 0:1 HCD
Losanna sa er auter che mo dar dir e betg fair. Al principi da la tschintgavla partida da quartfinal èsi stà l’equipa da la Svizra romanda che da èn il tact. Il HCD è vegni dominà durant l’emprim terz en tut ils grads. La relaziun da tirs en direcziun dals gols è frappanta. Losanna ha tratg 14 giadas en direcziun da Sandro Aeschlimann. Tavau ha be savì dar in unic tir en direcziun da Connor Hughes ed il gol da Losanna.
Losanna ha er attatgà en il segund terz. Plaun a plaun vegn il HCD alura dentant meglier en furma. Duas giadas tutgan giugaders dal Club da hockey da Tavau metal. Il goli Connor Hughes fiss stà battì, ma a la fin ha il rom salvà a Losanna da l’emprim cuntragol.
En la 50avla minuta stira Valentin Nussbaumer l’emprima giada ils mauns en l’aria. Fabian Heldner da Losanna ha cartì ch'el haja salvà il puck avant che quel è cumplettamain sur la lingia dal gol. Perquai han ils arbiters studegià per in brav mument la scena en il video e lura decidì la finala per gol. Losanna ha bittà tut enavant, igl n'ha dentant betg pli tanschì. Um dal gieu è il goli Sandro Aeschlimann che gioga puspè a nulla.
Il cumbat cun pugns a la fin da l’ultima partida ha gì consequenzas per la tschintgavla partida da quest duel. Davart da Losanna èn Tim Bozon e Cody Almond serrads ed han stuì prender plazza sin la tribuna. Ils giugaders pertutgads dal cumbat da pugns e dad in check cunter il chau dal HCD èn Kristian Näkyvä e Davyd Barandun.
Gieu 4: HCD 5:2 Losanna
Las partidas da chasa vul ins gudagnar. Uschia è il Club da hockey da Tavau partì en la quarta partida da quartfinal cunter Losanna. Suenter ch'il HCD aveva pers il mardi la partida a chasa cunter Losanna, eri cler che Tavau vul prender revantscha. Ora da la buna veglia n'è dentant capità nagut l’entschatta da la partida. Losanna è numnadamain stà l’equipa ch'è ida en la 11-avla minuta en avantatg. Il HCD è pero restà concentrà ed ha be duas minutas suenter pudì egualisar la partida. Il giuven Yannick Frehner ha reagì il pli spert ed ha fatg il pari al 1:1. A partir da quest mument era il HCD arrivà en il gieu. Lawrence Pilut da Losanna ha stuì ir sin il banc da chastis. La segunda situaziun da powerplay ha il HCD lura pudì nizzegiar. Matej Stransky ha fatg il gol al 2:1. Il HCD aveva stort il gieu aifer be novanta secundas. Cun quest avantatg èn las equipas idas en l’emprima pausa.
Il gieu resta stretg er en il segund terz. Omadus equipas cumbattan per il puck. Bleras schanzas na datti dentant betg. Per emoziuns procura in foul da Jiri Sekac cunter il schef da la defaisa grischuna Domnik Egli. Egli resta in mument sin il glatsch, Sekac sto ir per quest foul cunter il schanugl dad Egli sut la duscha. Il HCD po dar tschintg minutas cun in giugader dapli. In ulteriur gol na grategia dentant betg. Il HCD resta vidlonder e curt avant la fin dal segund terz tira Davyd Barandun davent da la lingia blaua sin il gol. Chris Egli sviescha il sajet da Barandun. I stat 3:1 suenter quaranta minutas.
Cun dus gols avantatg va il HCD en il terz terz da la partida cunter Losanna. Per quest avantatg ha l’equipa grischuna lavurà. Pli ditg che la partida va e pli confortabel che l’avantatg per Tavau vegn. Uschia capita quai che capita savens, cura che in'equipa è en avantatg e l’autra na riva betg da reagir: Losanna causa in chasti. Il HCD nizzegia questa situaziun da powerplay per far il 4:1. Il capitani Andres Ambühl fa il gol. Il HCD è durant quest gieu enorm effizient. Losanna fa il gieu e Tavau marchescha ils gols. Quai è alura memia bler per Losanna. L’equipa lascha dar ils pugns ed ils arbiters tramettan gist in pèr giugaders sin il banc da chastis. Il HCD po dar cun tschintg cunter trais e fa il proxim gol. 5:1 per Tavau da Valentin Nussbaumer. Quai è il terz gol ch'il HCD fa en il powerplay. Lawrence Pilut scursanescha anc sin 5:2. Per dapli na tanschi dentant betg. Tavau gudogna cleramain ed egualisescha uschia la seria da best of seven. Suenter quatter gieus statti pari 2:2.
Gieu 3: Losanna 3:2 HCD
Per l’emprima giada en la seria dal quartfinal tranter Losanna ed il Club da hockey da Tavau è ina squadra ida cun dus gols en avantatg. En l’emprim terz da la terza partida da quartfinal ha Losanna gist empruvà da prender il scepter dal gieu en maun. E quai è grategià. En la novavla minuta gist suenter la fin dal chasti cunter Joakim Norström ha Losanna pudì far il 1:0. Cun quai dentant betg anc avunda. Be duas minutas suenter ha Losanna puspè ina buna schanza, che Lukas Frick nizzegia per il 2:0. Uschia mal n'è il HCD anc mai partì en in terz da la seria da quartfinal encunter Losanna. Sper ils gols ha quai er anc dà in inscunter dolurus tranter Michael Hügli e Chris Egli. L’attatgader da Tavau resta sin il glatsch, l’arbiter trametta Hügli sut la duscha. Suenter ina interrupziun ha Egli pudì turnar sin il glatsch e cuntinuar cun il gieu.
Er al cumenzament dal segund terz è l’equipa da chasa quella che procura per il tempo, quella che fa squitsch. Losanna para simplamain pli viv. I na grategia dentant betg da far il 3:0. Sche Losanna ha ina giada ina schanza, alura è il goli dal HCD Sandro Aeschlimann sin ses post. El tegna sia equipa en la partida. En la 36avla minuta sto alura Marc Wieser ir per duas minutas sin il banc da chasti. Losanna po dar powerplay, l’equipa na fa dentant nagin gol. Lura turna Wieser dal banc da chasti sin il glatsch, il puck arriva tar el, e precis quest Marc Wieser ch'era anc avant paucs muments sin il banc da chasti marca il 2:1. Uschia è il HCD a la fin dal segund terz puspè plain en la partida. Precis uschia na vuleva il HCD betg partir en il davos terz. Be ina minuta e mesa suenter che las duas equipas èn vegnidas or da las cabinas, ha quai dà il proxim gol per l’equipa da la Svizra romanda. Il HCD ha pers il puck en la zona neutrala, svelt ha Losanna inizià il conter che Jiri Sekac ha terminà cun il 3:1. Il HCD ha dentant anc ina giada pudì reagir. Enzo Corvi lantscha Valentin Nussbaumer e quel scursanescha. Be pli 3:2 per Losanna. Per dapli n'ha quai dentant betg pli tanschì, era sche Sandro Aeschlimann ha bandunà a la fin ses gol per far plazza per in sisavel giugader. Suenter la victoria sonda passada a Losanna ha il HCD uss pers ordaifer.
Gieu 2: HCD 2:3 Losanna
Er en il segund duel da la seria tranter il HCD e Losanna è la differenza stada minima, nua che piculezzas han puspè decis il gieu. Questa giada dentant cun la meglra fin per l'equipa dal chantun Vad. Ina differenza è la fin finala il powerplay stà. Losanna ha nezzegià 2 da 3 chaschuns ed il HCD ha en set powerplays mo sajettà in gol.
L’emprim terz è stà in pulit spitachel offensiv d'omaduas equipas. L’emprim gol dal gieu han ils osps da Losanna sajettà. En powerplay ha l’Austriac Michael Raffl reagì il pli spert suenter ina parada da Sandro Aeschlimann e stuschà il puck en la rait. La reacziun dal HCD è stada vehementa. Kristian Näkyvä ha egualisà cun in sajet da distanza mo 40 secundas suenter l’emprim gol dal gieu.
Fin l’emprima pausa han omaduas equipas gì occasiuns da sajettar ulteriurs gols. Ils golis Sandro Aeschlimann sco er Connor Hughes tar Losanna n’han dentant betg laschar tiers ulteriurs gols en las emprimas 20 minutas.
En il segund terz è il gieu ditg stà pli controllà dad omaduas equipas. Uschia èn er grondas schanzas stadas raras durant las emprimas minutas. Cun plirs chastis nunnecessaris ha Tavau dentant pussibilità a Losanna da dar en powerplay. Uschia han els er nezzegià ina da quellas chaschuns en la 32avla minuta. Antti Suomela ha tutgà cun in sajet direct atras las chommas da Sandro Aeschlimann. In culp che fuss segir stà pussaivel da parar. Puspè è la reacziun dal HCD dentant stada exemplarica. Medemamain en powerplay ha Leon Bristedt egualisà en la 38avla minuta ord curta distanza suenter in fitg bel pass da Dennis Rasmussen.
L’ultim terz ha lura scrit sia atgna istorgia: Gist Ken Jäger, il giugader da Tavau ein il tricot da Losanna è stà il giugader ch’ha decis il gieu cun ses gol en la 48avla minuta. El ha reagì suenter in sajet bloccà il pli spert e stuschà il puck en la rait tar il 3:2 per Losanna. En las ultimas secundas ha il HCD anc ina giada schmatgà ed è entras Andres Ambühl e Joakim Nordström er vegnì a fitg bunas occasiuns. Ils osps han dentant spindrà il pitschen avanatg fin a la fin.
Dus gieus veglia è la seria da quartfinal tranter Tavau e Losanna uss. Ina seria ch'ha mussà exact quai ch'era da spetgar: Igl è ina seria guliva che sa cupitgar sin omaduas varts.
Gievgia saira vai vinavant cun gieu 3 da la seria. Lu puspè a Losanna.
Emprim gieu: Losanna 2:3 HCD
Igl è stà la saira da las 23:24 cura che Dominik Egli ha sajettà al cumenzament da la segunda prolungaziun il gol decisiv a favur dals Grischuns. Igl è stà in gieu che ha exact purtà quai ch’ins ha spetgà da las duas equipas. In duel fitg guliv cun dus ferms golis e nua che piculezzas han la fin finala fatg la differenza.
Il HCD ha cumenzà plain elan il gieu, ha fatg squitsch davent da l’emprima minuta ed è ì en avantatg meritadamain entras Leon Bristedt en la 7avla minuta. Ord curta distanza ha el sajettà il puck en la rait. La reacziun da Losanna è dentant vegnida immediat ed anc avant l’emprima pausa ha il defensur Andrea Glauser egualisà per il terz da la qualificaziun.
Suenter quest gol han ils fans en il stadion a Losanna duvrà pazienza enfin la 51avla minuta per vesair il proxim gol. Durant ina fasa da squitsch ha Lukas Frick sajettà il 2:1 per ils Romands cun in fitg bel slapshot da la lingia blaua. Tgi ch’ha pensà ch'il HCD è schoccà suenter quest cuntergol ha sbaglià. En powerplay ha Aleksi Mustonen egualisà per Tavau ina minuta pli tard. L’attatgader finlandais che dat pir dapi mez favrer per ils Grischuns ha sajettà uschia ses emprim gol en il tricot blau-mellen.
En la prolungaziun è Losanna stà ditg l’equipa che ha fatg dapli dal gieu, er cunquai ch’i han pudì dar duas giadas en powerplay. Sandro Aeschlimann en il gol dal HCD ha dentant puspè mussà ina giada ch’el tutga tar in dals megliers golis da la liga. Pliras giadas ha el spendrà sia equipa. Tavau è dentant er adina puspè stà malsegir, spezialmain suenter conters. Curt avant la fin da l’emprima prolungaziun ha in giugader da Losanna, per exempel spendrà sin lingia suenter in sajet da Joakim Nordström. La segunda prolungaziun ha lura mo cuzzà paucas secundas. Il defensur Dominik Egli ha nizzegià ina situaziun da dischurden en la zona da Losanna e sajettà il gol da la victoria.
L’emprim gieu da questa seria da quartfinal ha mussà tge ch’è il spezial vid il hockey durant ils playoffs: Il cumbat, l’intensitad e las emoziuns. Quest duel è uss en mintga cas lantschà. Vinavant cun il segund gieu da la seria vai mardi saira a Tavau.
Avant il gieu
L’emprima finamira da questa stagiun ha il HCD cuntanschì. L’equipa grischuna è sa qualifitgada sco sisavla suenter la qualificaziun directamain per la fasa finala dal campiunadi. Vitiers ha il HCD er anc gudagnà la Cuppa Spengler. Uss dentant cumenza la stagiun pelvaira. Il HCD n'è betg mo cuntent cun questas finamiras parzialas.
Chapì il sistem «Holden»
Al cumenzament da la nova stagiun hai duvrà in zichel peda fin ch'il Club da hockey da Tavau ha cumenzà da giugar tenor il sistem dal nov trenader Josh Holden. A l’entschatta mancava anc in pau la constanta. Durant las davosas partidas da la qualificaziun ha il HCD dentant chattà questa constanta, il Club da hockey da Tavau è vegnì adina meglier en furma. Da las davosas 10 partidas da qualificaziun ha il HCD gudagnà otg gieus. Il pli gugent avess l’equipa grischuna gist cuntinuà cun il campiunadi. Uschia han els, sco er Losanna, stuì far ina pausa sfurzada e dattan pir suenter 13 dis puspè in gieu da hockey nua ch'i va per insatge.
Per in hockeyan è quai in lung temp senza gieu cumpetitiv sin il glatsch. U sco l'attatgader dal HCD, Enzo Corvi di: «13 dis pausa è simplamain memia lung». Tenor el fissi meglier sch'ils megliers otg da la qualificaziun fissan en ils playoffs e ch'i na dess betg «play-ins». Uschia èsi ils davos dis stà da trenar ed anc ina giada trenar. Tranter auter è la tactica è stada en il focus, cun sa preparar sin l'adversari Losanna. Plinavant èsi è stà da bajegiar si ina tscherta intensitad en vista als playoffs.
Il HCD brama ch'i va liber
Suenter questa pausa èsi uss uras ch'i va liber. Mintga giugader da hockey fa quest sport per dar gieus. Il HCD sa far quai cun quasi tut l’equipa ch'è sauna. Il lazaret dals emprims mais dal campiunadi è vegnì bler pli pitschen. Uschia ch'il trenader Josh Holden sa er disponer da quasi tut il persunal.
