Dus onns han ils responsabels fabritgà vi da la pli moderna mesapipa dal mund tar la stagiun da mez Murtèl sin il Corvatsch. La «pipe» che ha custà circa tschintg milliuns francs, è vegnida construida en vista als proxims campiunadis mundials da snowboard, freestyle e freeski l’onn 2025 en l'Engiadin'Ota. La mesapipa è vegnida inaugurada la fin da favrer. Uss vegn ella anc testada sut cundiziuns da concurrenzas. Curriduras e curridurs da la cuppa europeica siglian en la mesapipa sin il Corvatsch per las davosas plazzas da podest da questa stagiun.
Avertura sin livel da concurrenzas
En vista als proxims campiunadis mundials da freestyle han ils organisaturs da testar e da far concurrenzas sin tut ils indrizs e sin tut las pistas. Sco davos spetgan uss anc las concurrenzas da la cuppa europeica en la nova «pipe». Quai è in enorm chanal da naiv da circa 180 meters lunghezza, 21 meters lartg, e las paraids èn circa set meters autas. Quai è il terrain optimal per mussar sin il Corvatsch ils megliers sigls e trics sin ils skis e sin il snowboard.
Experientschas vegnan dabun als campiunadis mundials
Per ils organisaturs, per las numerusas voluntarias e voluntaris, dentant er per las pendicularas èsi impurtant da testar tut ils implants sut cundiziuns dad ina concurrenza. Uschia ves’ins cura ch'igl è da preparar la mesapipa, e da glischnar giu quella – per che tut ils participants e las participantas hajan las medemas cundiziuns. Vitiers vegn il timing cura ch'ins ha dad esser pront per las differentas concurrenzas. Quellas experientschas èn be da ramassar cun far eveniments. Quai che funcziuna gia ussa bain, vegn surpiglià per ils proxims campiunadis mundials l’onn proxim – e quai che na funcziuna anc betg hai num surlavurar. Per che tut saja alura pront il mars 2025 per l’emprim campiunadi mundial da quest gener en Svizra.
