Dapi la sonda ha la Federaziun svizra da ciclissem in nov timun. Luana Bergamin da Lai è vegnida elegida sco emprima presidenta da Swiss Cycling. Cun 210 encunter 180 vuschs ha ella gudagnà il cumbat per il presidi encunter Marisa Reich. Luana Bergamin ha 40 onns, è deputada en il Cussegl grond, ha in'atgna fatschenta en il sectur da sport cun mandads a divers gronds events sco per exempel la cuppa mundiala da skis, da biatlon u era da mountainbike a Lai.
Jau hai gnanc anc gì peda da realisar ch'jau sun la presidenta da Swiss Cycling, ma jau sun fitg motivada.
Nov n'è il mund da velo betg per Luana Bergamin. Ella lavura gia intgins onns per Swiss Cycling ed enconuscha la filosofia e structura da la federaziun. Er en il Grischun è ella gia s'engaschada per il velo, saja quai sco presidenta da la cuppa mundiala da mountainbike a Lai ubain er cun temas en il Cussegl grond.
Discussiuns avant l'elecziun
Suenter trais uras ha l'elecziun purtà in resultat stgars da 210 cunter 180 vuschs a favur da Luana Bergamin. L'elecziun ha carmalà uschè bleras delegadas e delegads sco anc mai, la finala ha la Rumantscha fatg la cursa ed è uss l'emprima dunna insumma a la testa da la federaziun ch'i dat dapi 142 onns, ella cumenzia l'uffizi «cun grond respect».
Bergamin succeda a co-presidents da fin qua Franz Gallati e Patrick Hunger che n'eran betg pli sa mess a disposiziun.
Engaschi per il biatlon
L'enviern passà è Luana Bergamin stada fermamain engaschada en l'organisaziun da la cuppa mundiala da biatlon a Lai. Ella n’è betg mo responsabla per il program accumpagnant, mabain è era substituta dal CEO Silvio Baselgia. Ils Cuntrasts dattan in'egliada davos las culissas da l'eveniment grond.
