- La naziunala svizra fa a Son Gagl cunter la Lituania ina victoria da 1:0 en la qualificaziun per il campiunadi mundial.
- Il sulet gol da la partida sajetta Xherdan Shaqiri gia en la 2. minuta.
- Damai ch'in dals dus gols en il Kybunpark n'era betg confurm a las reglas, ha il gieu cumenzà cun in retard da bunamain 20 minutas.
Cun far 6 puncts en dus gieus ha la Svizra cumenzà bain la qualificaziun per il campiunadi mundial, quai che pertutga ils resultats. Suenter il 3:1 cunter la Bulgaria la gievgia, han ils Svizzers cuntinuà cun in 1:0 cunter la Lituania. La prestaziun en questa partida è dentant stada mediocra.
Bain ha l'equipa da Vladimir Petkovic giugà en urden en la defensiva. Durant l'entir gieu n'han ils giugaders da la Lituania gì nagina schanza che vala quest pled. Dentant offensiv ha la Svizra fatg suenter il gol spert tras Xherdan Shaqiri memia pauc.
Gol memia aut
Il gieu ha cumenzà cun intginas minutas retard en il Kybunpark a Son Gagl. L'autezza d'in gol na consteva betg. Quel era plirs centimeters memia aut ed ha stuì vegnir barattà curt avant il tschivel d'entschatta . Tenor infurmaziuns da SRF ha il team dals golis svizzers annunzià l'irregularitad.