- La naziunala svizra è partida cun success en la qualificaziun per il campiunadi mundial dal 2022 en il Katar.
- L'equipa dal trenader Vladimir Petkovic gudogna ordaifer a Sofia cunter la Bulgaria cun 3:1.
- En las emprimas 12 minutas crodan tut ils gols svizzers, la segunda mesadad laschan ils Svizzers vegnir meglier en il gieu ils Bulgarais.
- En il segund gieu dal di en la gruppa C frunta l'Italia sin l'Irlanda dal Nord.
Gist 12 minutas eran giugadas, e la Svizra manava gia cun 3:0 cunter la Bulgaria. Breel Embolo, Haris Seferovic e Steven Zuber han marcà ils gols en questa fasa da pressing svizra. Suenter ha la Svizra controllà il gieu senza problems fin la pausa.
Strusch aveva la segunda mesadad cumenzà, che la Bulgaria vegn da scursanir al 1:3. Silsuenter èsi gartegià als Svizzers da puspè quietar il gieu, ils Bulgarais èn dentant dapli en l'offensiva.
Sia proxima partida ha la naziunala svizra da ballape la dumengia – a Son Gagl spetga la Lituania.
Italia ademplescha si'emprima missiun
En la medema gruppa sco la Svizra cumenza l'Italia bain la qualificaziun. A Parma gudognan ils azzurri da Roberto Mancini l'Irlanda dal Nord cun 2:0. Ils gols han fatg Domenico Berardi e Ciro Immobile. La dumengia frunta l'Italia a Sofia sin la Bulgaria.
