En la 53avla minuta ha il goli da la squadra naziunala, Yann Sommer, parà in penalti da Jorginho. Per la Svizra han Manuel Akanji e Denis Zakaria gì las meglras schanzas per sajettar in gol.
La Svizra ha giugà enfin ussa duas partidas damain che l’Italia. Ella ha il mument quatter puncts damain ch’il campiun europeic. Il proxim gieu da la qualificaziun per il campiunadi mundial è la mesemna che vegn. Là frunta la Svizra a Belfast sin l’Irlanda dal Nord.
Ils resultats da las ulteriuras partidas:
- Germania – Amenia 6:0
- Spagna – Georgia 4:0
- Belgia – Tschechia 3:0
- Cosovo – Grazia 1:1
Partida Brasilia – Argentina vegnida interruta
Cun in'acziun probablamain unica han las autoritads da sanadad brasilianas interrut il gieu da qualificaziun per il campiunadi mundial, tranter la Brasilia e l'Argentina. Perquai che ballapedists argentins duain avair cuntrafatg a mesiras da corona, han emploiads dal servetsch sanitar brasilian intervegnì.
Sis minutas suenter ch'il gieu ha cumenzà a Sao Paulo, han trais giugaders argentins stuì bandunar il plaz. Silsuenter ha l'arbiter rut giu il gieu. La Fifa sclerescha uss ils schabetgs.
