La situaziun da partenza era clera. Ils Young Boys ston gudagnar sch'els vulan far il pass en la proxima runda. Ordaifer aveva la squadra bernaisa sulettamain giugà pari 0:0 cunter l'adversari da Bratislava. Cun grond schlantsch ha YB alura era cumenzà la partida.
L'emprim gol è er gist crudà suenter 8 minutas entras Siebatcheu. L'American n'ha betg laschà prender la schanza davent dal punct da penalti. Silsuenter èsi alura stà Bratislava ch'ha giu en la 19avla minuta la schanza da sajettar in penalti – von Ballmoos ha dentant tegnì suveran il sajet en il chantun dretg. Igl èn stadas las minutas decisivas. Mo trais minutas suenter il penalti da Bratislava ha numnadamain Ulisses Garcia sajettà il 2:0. In belleza gol dad Aebischer en la 48avla minuta ha alura atgnamain decidì la partida en favur dals Young Boys.
Atgnamain. Pertge ch'ils Young Boys èn stads tut auter che stabils en la defensiun. En la 60avla minuta ha in autogol da Kanga reducì sin 1:3 ord vista da Bratislava e be duas minutas pli tard ha alura Henty sajettà il 2:3. Quai malgrà che YB era la pli ferma equipa. En la defensiun dals Bernais hai dentant adina puspè dà in u l'auter sbagl. Cunzunt cun balls lungs ha la defensiun da YB giu da cumbatter. Curt avant la fin avess Bratislava alura stuì survegnir in penalti – l'arbiter ha dentant survesì in hands. A la fin ha l'avantatg da trais gols dentant tanschì per la squadra da David Wagner.
En la proxima runda da qualificaziun fruntan ils Bernais sin la squadra da Cluj or da la Rumenia.
