Siglir tar il cuntegn

Header

video
Las meglras scenas dal gieu Italia – Svizra
Or da Sport-Clip dals 12.11.2021.
abspielen. Laufzeit 4 minutas 26 Sekunden.
cuntegn

Qualificaziun CM 2022 Ferma Svizra gioga pari cunter l'Italia

En il duel per la qualificaziun directa al campiunadi mundial en il Katar statti tranter la Svizra e l'Italia avant il davos gieu tar il status quo. A Roma han las duas meglras equipas da la gruppa C giugà pari 1:1.

La pli gronda schanza dals Talians ha manchentà il capitani Jorginho en la 90avla minuta, cura ch'el ha sajettà in penalti sur il gol svizzer. Ulisses Garcia aveva stuschà levet ses adversari.

Ina terrada fiss stada pitra per l'equipa da Murat Yakin, ch'è partida a moda optimala en il gieu. Noah Okafor ha dà en la 11avla minuta in bun pass sin il defensur Silvan Widmer. Quel ha sajettà il bal ord 18 meters sut la latta.

L'Italia ha lura duvrà in pèr minutas per sa revegnir dal schoc. A Nicolo Barella n'èsi betg gartegià da batter il ferm goli svizzer Yann Sommer (22.). Lura ha Giovanni Di Lorenzo dentant pudì profitar d'in sbagl da Sommer, e marcà en la 36avla minuta cun il chau al 1:1.

Italia cun lev avantatg

Cun il pari 1:1 resta l'Italia emprim da la gruppa C – cun tuttina blers puncts sco la Svizra, dentant cun dus gols dapli quai che pertutga la differenza da gols. Sulet l'emprim da la tabella sa qualifitgescha direct per il campiunadi mundial l'onn che vegn.

Il glindesdi gioga la Svizra a Lucerna cunter la Bulgaria e basegna uschè blers gols sco pussaivel. En vista a l'emprim gieu cunter quest adversari (la Svizra manava suenter 12 minutas cun 3:0) nagina chaussa nunpussaivla. Il medem temp fruntan ils Talians sin l'equipa da l'Irlanda dal Nord.

RTR novitads 23:00

Artitgels legids il pli savens

Scrollar a sanestra Scrollar a dretga