La scena decisiva dal gieu è capitada curt suenter che la Svizra ha egualisà. Lura ha l’attatgader svizzer Breel Embolo survegnì la segunda charta melna ed ha stuì ir giu dal plaz. Cun verifitgar ina situaziun ch’igl assistent arbiter da video VAR ha annunzià, ha l’arbiter vis ina simulaziun d’Embolo e tramess quel giu dal plaz.
Yakin porta novs giugaders per s’adattar a la situaziun
Murat Yakin ha sinaquai midà ses sistem e rinforzà la defensiva. Uschia ha el sperà da pudair tegnair avunda ditg il pari 1:1. Ils Argentins han dentant intensivà lur sforzs, ed han gia gì en il temp regular bunas schanzas. En la 112avla minuta ha Julian Alvarez dentant marcà cun il chau e na laschà nagina schanza al goli Gregor Kobel. Curt avant la fin ha Lautaro Martinez anc sajettà suenter in conter il 3:1 per l'Argentina.
Ditg stà in gieu avert
La terrada posta in gust piter ord vista svizra, damai che la schanza da vegnir per l’emprima giada insumma en in mezfinal d’in campiunadi mundial è manchentada. Durant 70 minutas han ils Svizzers pudair tegnair pitg senza problems als Argentins che n’han fin lura betg mussà la massa. Suenter il 1:0 suenter 10 minutas tras Alexis Mac Allister han quels numnadamain surlaschà als Svizzers da far il gieu.
La Svizra aveva dentant strusch ideas e giugava pauc exact. Puspè mancava Johan Manzambi, che ha vinavant stuì pausar pervi da sia blessura vi d’in schanugl. Pir en la segunda mesadad èn ils Svizzers vegnì sin turas, ed en la 67avla minuta ha Dan Ndoye pudì egualisar. Lura è suandada la scena desastrusa cun Embolo e la segunda carta melna. Uschia è in ferm campiunadi mundial stà a fin en il quartfinal.
Star ensemen per vesair co la Svizra dat – era a Sedrun
Sco en blers auters lieus en Svizra han ils fans da la naziunala svizra da ballape era chattà a Sedrun in lieu per giudair da cumpagnia il gieu da la Svizra cunter l’Argentina. Malgrà il temp nunusità da las 3 en damaun, han radund 40 persunas chattà la via al public viewing per tegnair ils poleschs – lur egls eran dentant anc in pau pitschens.
Uschiglio natiralmain faschevan nus adina grill – dentant amez la notg na faschain nus betg quai.
Entant ch’in ni l’auter dals fans aveva anc en maun la gervosa da la sortida, laschavan auters schon gustar l’emprim café. Ina chaussa è dentant stada cuminaivla – tuttas e tuts han patì e tremblà ensemen cun la naziunala svizra da ballape.
A Kansas City per dar il quartfinal cunter l'Argentina
Arrivada en il quartfinal è la Svizra grazia a sia victoria cunter la Columbia en in grond gieu a Vancouver. Per decider l'otgavelfinal hai duvrà in sajettar penaltis. Il goli Gregor Kobel ha briglià, e la fin finala ha Ramon Vargas gì gnerva da fier ed ha realisà ses penalti. Uschia èsi stà cler, i va vinavant cunter l'Argentina en il quartfinal.
Cunter ils Sidamericans han ils Svizzers gia dà duas giadas ad in campiunadi mundial – e pers duas giadas. Sper il 0:2 al campiunadi mundial il 1966 è surtut l'otgavelfinal al campiunadi mundial il 2014 anc en memoria. Là ha la naziunala pers 0:1 suenter la prolungaziun. Granit Xhaka e Ricardo Rodriguez eran gia lura da la partida.
L'ultima giada nua che la Svizra è stada en il quartfinal era tut auter
Cun la victoria cunter la Columbia ha la Svizra cuntanschì in success istoric. Per l'emprima giada en il temp modern da ballape è la Svizra stada en in quartfinal dal campiunadi mundial. L'ultima giada è quai stà il cas al campiunadi mundial da chasa il 1954. Ma da lez temp era il mund da ballape tut in auter.
Il 1954 n'ha betg guardà tut il mund sin il campiunadi mundial. Igl era schizunt l'emprima giada ch'ils gieus èn vegnids emess en la televisiun. Cunquai ch'apparats da televisiun eran da quest temp anc rars, vegnivan blers gieus guardads en ustarias – quasi ina furma tempriva dal public viewing. La tecnica era logicamain anc sin tut in auter stan. Uschia è la transmissiun dal final dal campiunadi mundial tranter l'Ungaria e la Germania vegnida fatga cun sulet trais cameras.
Il quartfinal cunter l'Argentina ha la Svizra dà a Kansas City en il stadi american da Missouri. L'arena da l'equipa da la NFL Kansas City Chiefs tschiffa 73'000 aspectaturas ed aspectaturs ed è enconuschenta sco «Hexenkessel».
Notg libra en tscherts lieus en la Svizra
En divers lieus en la Svizra hai dà tranter sonda e dumengia ina notg libra. Tranter auter era a Cuira. La regenza da la citad ha decidì che manaschis en la miglia da sortida Welschdörfli che ston normalmain serrar a las 03:00, dastgan mussar il gieu endadens. Tut ils auters manaschis che serran normalmain avant las 03:00 dastgan medemamain mussar il gieu. Els han dentant stuì dumandar ina lubientscha per prolungar l'ura da polizia.
En il rest da la Svizra hai dà notgs libras per exempel a Turitg, Winterthur, Berna, Lucerna e Zug. Ed era en divers chantuns datti reglamentaziuns che permettan ina notg libra.