La runda d’atun n’è betg ida sco giavischà al Club da ballape da Domat che dat dapi il 2021 en la segunda liga regiunala. Dals 13 gieus da campiunadi han ils da Domat pudì gudagnar sulet trais. L’avantatg sin il stritg ed uschia sin in plaz da relegaziun munta a sulettamain dus puncts.
Nus avain pers plirs giugaders cun blera rutina ed experientscha, e gist quella manca il mument en l’equipa ch’ha en media be 23 onns.
Il trenader Eder Lala è dentant da buna speranza che sia equipa mitschia da questa relegaziun, cunzunt sche l’equipa vegnia da mussar sin il plaz quai ch’ella haja trenà. E trenà è vegnì intensiv, quai gia dapi ils 6 da schaner. Dacurt ha l’equipa lura anc absolvì in camp da trenament a Barcelona.
Resultats e tabella 2. liga
Liber cun la runda da primavaira vai per il CB Domat la dumengia, ils 22 da mars, cun il gieu da chasa cunter Bogn Ragaz che sa chatta sin il 7avel plaz da la tabella.
Signal per fidanza e cuntinuitad
Gia il favrer ha il club prolungà il contract cun il schef-trenader Eder Lala per in’ulteriura stagiun, pia ina giada fin la stagiun 2026/27. In signal che l’equipa ed il club è cuntent ed ha fidanza en lur trenader. Sco nov trenader assistent ha Domat plinavant engaschà l’indigen Vincenzo Pastanella.