Suenter ina absenza da blers onns è Valposchiavo Calcio turnà la primavaira 2023 puspè en segunda liga da ballape. L’emprima stagiun enavos en segunda liga ha Valposchiavo Calcio salvà be per il nair da l’ungla da la relegaziun. Uss dentant è l’equipa etablida en questa liga. L’atun era la squadra dal Grischun dal sid perfin a la testa da la tabella.
Cumenzament da la runda da primavaira
Suenter uschè ina stupenta runda d’atun avess Valposchiavo Calcio il pli gugent cuntinuà cun il campiunadi. Er sche igl è adina er bun da far ina pausa, di il capotiragols da Valposchiavo Calcio, Mattia Cathieni.
Bainprest ha la squadra alura il schaner, favrer puspè cumenzà cun il trenament. Ed uss il mars è l’equipa puspè pronta da cuntinuar cun il campiunadi. Il pli gugent faschess l’equipa vinavant sco ch’ella ha terminà la runda d’atun. Sin las emprimas plazzas da la tabella.
Ferms giugaders e bun spiert d’equipa
Valposchiavo Calcio è creschì durant ils ultims onns en segunda liga. La squadra dispona dad ina buna maschaida da giugaders rutinads e da giuvens che vegnan si da la segunda equipa. Quella maschaida procura per ina buna atmosfera en l’equipa. Savens discurran ils giugaders da Valposchiavo Calcio era da l’uschenumnà spiert da famiglia che regia en l’equipa. Tuttas e tuts en pronts da dar bler per l’equipa sin il plaz, dentant era sper il plaz en la societad.
