Il Planoiras, la cursa populara e tradiziunala da passlung a Lai, festivescha quest onn il giubileum da 40 onns. Il Planoiras n’è betg sulet in punct culminant per la regiun da Lai, mabain er in punct uffizial en il chalender da la seria da cursas da maraton «worldloppet». La cursa Planoiras tutga tar ina da las 11 grondas cursas popularas da passlung en Svizra.
Il giavisch dals organisaturs è da pudair realisar questa cursa da giubileum sin il percurs original che maina da Lantsch fin a Parpan ed enavos a Lai, quai sur la distanza 25 kilometers. I dovra dentant danovamain gronds sforzs per che quai gartegia, quai pervia da las relaziuns da naiv. Ils davos dis ha il favugn maglià blera naiv, la cuverta da naiv è uschè satiglia, cunzunt sin la passascha da la plazza da golf tranter Lantsch e Lai. N’avess la naiv betg da tanscher èn ils organisaturs sfurzads da manar tras la cursa be en l’arena da biatlon, sco gia il 2023. Dasper il Planoiras datti er quest onn il Planoirino, la cursa curta sur 13 kilometers. E gia la sonda, pia il di avant, vegn manà tras sin la Luziuswiese per la 28avla giada las cursas per uffants e giuvenils en las categorias U8 fin U20.
I vegn spetgà 400 participantas e participants
Il comité d’organisaziun quinta cun fin a 400 annunzias. Fin la mesemna, quatter dis avant la cursa, èn però annunziads be radund 150 curridras e curriders. Blers spetgan enconuschentamain dentant pir fin il davos mument da s’annunziar. E bler dependa mintgamai er da la previsiun da l’aura.
Infurmaziuns 40avel Planoiras 2025
Prominents a la partenza
Sin la glista da partenza figureschan gia oz plirs nums da renum, tranter quels er Toni Livers oriund da Trun. L’anteriur profi da passlung ha gia gudagnà quatter giadas il Planoiras, fin oz in record. Tar las dunnas tegn Jasmine Nunige da Tavau il record cun tschintg victorias. Egualisar quest record pudess quest onn la dunna da Toni Livers, l’anteriura curridra professiunala Seraina Boner da Claustra ch’ha gudagnà tranter il 2012 ed il 2022 quatter giadas questa cursa. Er a la partenza è il mountainbiker Nino Schurter e l’anteriura biatleta Selina Gasparin.
Club da skis Bual
Organisà vegn la cursa dal Club da skis Bual da Lantsch, in club ch’è vegnì fundà il 1971. Avant passa 50 onns fascheva quasi mintgin part a quest club. Sur tut quels onns saja il dumber però sa reducì da bun 400 commembers sin oz anc 160 commembers, uschia Leo Baselgia ch’è dapi 45 onns en suprastanza, dapi 21 onns sco president. Cun la fin da la stagiun giaja questa carriera dentant a fin, di Leo Baselgia che vul uss surdar las hottas en mauns pli giuvens.
Il cor dal Club da skis Bual èn oz ils 35 giuvenils che treneschan fin duas giadas ad emna, quai sut la batgetta da 10 manaders. Auter ch’anc pli baud cumenza la gronda part da questa gruppa dad JO cun ils onns er anc a far biatlon, in terz dad els fetschia be biatlon, di Leo Baselgia. Grazia a l’Arena da biatlon a Lantsch ha il club oz er in’infrastructura optimala per trenar. Sper l’arena vegn producì dapi intgins onns gia baud naiv a Lantsch uschia ch’ils giuvens pon cumenzar gia baud cun ils trenaments sin ils skis e la stad han els la pussaivladad da trenar en l’arena sin ils skis da rodas. Premissas optimalas per forsa lantschar in di ina carriera da sport e daventar profi, in siemi da blers uffants e giuvenils.