L'euforia da ballape è suenter la EURO da dunnas er da sentir e persequitar sin las plazzas da ballape en il Grischun. Il trenader da l'equipa da dunnas da Cuira 97 Vendim Gashi di per exempel, ch'i vegn uss imità pli e pli savens giugaduras empè da giugadurs. Quai saja bel da vesair.
Vegnan uss automaticamein dapli dunnas e giuvnas a dar ballape?
Gronda euforia na munta dentant betg automaticamain che dapli dunnas e junioras vulan vegnir a dar ballape en ils clubs. Tar Cuira 97 hai questa stad dà in lev augment cumpareglià cun l'onn passà, di il president Antonello Giallucca. Mo i na saja betg uschia ch'els sajan vegnids inundads cun annunzias.
In tschert boom per il ballape da dunnas haja gia dà ils ultims onns, di Stefania Daniele ch'è la responsbala per il ballape da dunnas tar il CB Domat. Avant tschintg onns avevan els mo in'equipa activa e strusch in'equipa da mattatschas. Ed uss hajan els trais equipas da junioras e plinavant er anc l'equipa activa.
Cun in project è er Tusaun/Cazas gia avant dus onns vegnì da carmalar giuvnas e dunnas en il club, raquinta Reto Keller che coordinescha il ballape da dunnas tar il club. Lura sajan els vegnids inundads cun annunzias. Quai saja tenor el era il motiv ch'i ha uss suenter l'EURO strusch dà novas annunzias. Oz è Tusaun/Cazas la grond'uniun en il chantun sch'i va per il ballape da dunnas – cun 80 junioras e 40 giugadras activas.
Ina tscherta euforia sentan ins era en Surselva gia dapi intgins onns. La trenadra da l'equipa da dunnas dal Team Surselva (3. liga) Bea Caduff manegia dentant ch'i na saja betg mo da spetgar e sperar uss suenter il campiunadi europeic. «Igl è da discurrer cun la glieud e dumandar sch'i vulan vegnir a dar ballape». La EURO haja segir mess ina buna basa, «ma i dovra dapli». Cun quai manegia ella ch'igl è da motivar e da far gust a las dunnas e giuvnas da vegnir a dar ballape.
Schanzas e sfidas
Mintga club ha la finamira che mattatschas e dunnas cumenzan a dar ballape per pudair far novas equipas da junioras u era cun dunnas activas. Quai menziuna era il president dal CB Domat Walter Frizzoni. Dentant datti er sfidas, avertescha el. Spezialmain sch'el patratga vi da l'infrastructura. Sch'i dat dapli dunnas che vegnan a dar ballape, èsi er da guardar ch'i dettia avunda gardarobas e quà èsi d'organisar bain. «La finfinala èsi d'investir en l'infastructura», manegia Frizzoni. In'ulteriura sfida saja er da chattar avunda trenadras.
Ma l'emprim èsi da guardar quant grond ch'il svilup en il ballape da dunnas vegn ad esser ils proxim onns. Glistas da spetga sco quai ch'ins ha per part udì d'equipas da la Bassa, na datti betg tar ils clubs grischuns.
