Durant quatter emnas èsi vegnì cumbattì per il titel da campiun europeic. La fin finala las Englaisas che han fatg la cursa cun ina victoria en il final encunter la Spagna.
En tut han 34'203 aspectaturs ed aspectaturas persequità a Basilea il final. Il punct culiminant dad ina EURO che ha attratg uschè blers aspectaturs ed aspectaturas ad in campiunadi europeic da las dunnas sco anc mai – numnadamain total 657'291 sur l'entir turnier. Sch'ins taidla sin las equipas e sin ils organisaturs è l'EURO 2025 en Svizra stada in grond success.
Nus guardain cun Gian Carlo Candinas da la redacziun da sport enavos sin quest turnier e guardain tge che ha funcziunà fitg bain e tge forsa betg uschè bain.
Tut en tut è il turnier, ord vista dal ballape, stà in grond success, u?
In immens success per il ballape da dunnas. Stadions plains, euforia totala en Svizra. Tgi na sa regorda betg vi dals marschs da fans durant ils gieus da la Svizra. Fin 25'000 persunas. Ed jau vi schon dir: Anc mai è il ballape da dunnas stà uschè preschent tar nus sco las ultimas quatter emnas.
Plinavant è il turnier stà fitg paschaivel. Ins n'ha mai udì da cravals u insatge en questa direcziun, sco ch'i dat magari tar ils umens. En ils stadions è era stà da vesair in auter public. Dapli famiglias cun uffants. Ed er il dumber d'aspectaturs avant la televisiun è stà fitg aut. Per exempel bunamain in milliun aspectaturs tar SRF tar il gieu tranter la Svizra e la Spagna.
Tge dis da la qualitad dal ballape durant las ultimas emnas?
Buns gieus, tecnicamain fermas equipas. Ins vesa in grond svilup ch'il ballape ha fatg ils ultims onns. La differenza tranter las naziuns è vegnida pli pitschna. Cler, betg tut ils gieus han gì la medema qualitad, dentant tut en tut in svilup fitg positiv.
Tge ch'jau less era menziunar è ch'igl è impurtant da betg cumparegliar gieus dad umens cun quels da las dunnas. Insatge che vegn anc adina fatg fitg savens. Igl è dentant simplamain insatge auter, gia pervia da l'anatomia, pia la fisica da giugadurs, respectiv giugaduras.
Las dunnas han procurà per euforia. E natiralmain in motiv principal per l’euforia – la naziunala svizra che ha persvadì?
Gea, lezza ha propi laschà il cor sin la plazza da ballape durant ils quatter gieus. En mintga gieu è ella vegnida da tschiffar il public. Quai ha fatg impressiun. La naziunala è vegnida da procurar per ina grondiusa atmosfera ed euforia. Tgi na sa regorda betg, per exempel, vi dal mument cur che la Svizra ha sajettà il 1:1 encunter la Finlanda en il temp supplementar. La mesa Svizra è, tenor sentiment, siglida si dal canapé tar quest gol.
U er il cumbat encunter la Spagna, nua che l'equipa è siglida en mintga bal ed ha defais cun tut quai ch'igl avevan, ha fatg impressiun.
Datti tuttina anc puncts che n'han betg plaschì a tai?
Jau hai gì il sentiment che tut è adina stà fitg euforic, spezialmain en las medias. Igl è adina vegnì ditg quant super che la Svizra haja dà, che tut saja fitg ferm.
Ed jau na vi betg esser il «ruinafestas» en quest connex. Ma quai n'è savens betg stà fitg objectiv. Tenor mai ston ins era gughegiar da crititgar l'equipa, exact sco quai ch'i vegn era fatg tar ils umens.
Sch’ins guarda, per exempel sin la naziunala svizra ston ins dir: Igl è stà bler cumbat, dentant propi dal dar ballape n'ha la Svizra betg persvas savens. L'emprima mesadad encunter la Norvegia en l'emprim gieu è stada ferma, ma suenter èsi stà finì cun il bun e bel ballape. Igl è plitost stà in grond cumbat, era magari in «Krampf». E quai dastg'ins era dir uschia, tenor mai. I para dentant sco sche las medias na vulevan betg crititgar quests puncts.
Quai è tes sentiment. Daco èsi pli heicli da crititgar il ballape da dunnas?
Forsa hai era da far cunquai ch'ins ha gì tema da far empaglia in pau il svilup ch'i dat en il ballape da dunnas. Il ballape da dunnas sin ina tala tribuna sco durant questa EURO è tuttina anc insatge pulit nov e na tutga betg tar il mintgadi. E cun betg crititgar protegian ins, instinctiv, in pauet il sport.
E tge resta uss da quest turnier?
Il turnier è stà in grond success e quai dad A fin Z. Puncto svilup dal ballape da dunnas ed era puncto organisaziun. I n'ha dà nagins incaps, sulettamain blera euforia ed igl è stà in pau in «Sommermärchen» en Svizra las ultimas quatter emnas. La Svizra è stada in fitg bun pajais ospitant durant questa EURO.
Gian Carlo Candinas
Redactur RTR