Siglir tar il cuntegn

Header

cuntegn

Ballape regiunal 3. liga CB Trun/Rabius – US Schluein Glion 1:1

Il derbi sursilvan da la terza liga da ballape tranter il CB Trun/Rabius e l'US Schluein Glion è ì a fin cun in pari dad 1:1. Cuort suenter pausa è Trun/Rabius ì en avantatg entras in penalti da Livio Janka. En la 75avla minuta ha Lars Caduff pudì egualisar per Schluein Glion, medemamain entras in penalti. Las davosas bun 25 minutas ha l'equipa da la Cadi stuì giugar cun in giugader pli pauc suenter ina carta cotschna cunter Daniel Pfister.

audio
Andreas Wieland cun in rapport dal gieu
ord Actualitad dals 03.04.2023. Maletg: RTR
laschar ir. Durada: 4 minutas 37 Secundas.

Sin il palpiri valeva l’US Schluein Glion sco il grond favurit, mo da quai n’è stà da vesair pauc durant l’emprima fasa dal gieu. Il CB Trun/Rabius ha durant bun 20 minutas dictà il gieu. Pir encunter pausa è l’equipa da la Foppa sa dasdada e vegnida tar pliras bunas schanzas. Tranter auter ha Marino Cavegn tuc be la pitga en la 40avla minuta. Er suenter la pausa ha l’equipa da chasa chattà meglier la via en il gieu ed ida meritadamain en avantatg. Cura che Daniel Pfister ha survegnì sia segunda carta melna ed uschia la carta cotschna en la 67avla minuta ha Schluein Glion pudì agir cun in giugader dapli. Plinavant ha Trun/Rabius pers dus giugaders, Mirco Pfister e Beat Cadruvi, pervia da blessuras. Pront ha l’equipa dal trenader Corsin Cavegn pudì egualisar il gieu ed avess a la fin dal gieu er gì avunda schanzas da sajettar in segund gol ed uschia er gudagnar il segund derbi cun Trun/Rabius en questa stagiun. La fin avust da l’onn passà aveva l’USSI battì a chasa l’equipa da la Cadi cun 2:1.

audio
Discurs cun Gian Sgier (USSI) e Livio Janka (Trun/Rabius)
ord Actualitad dals 03.04.2023. Maletg: RTR
laschar ir. Durada: 9 minutas 36 Secundas.

En la tabella ha l'US Schluein Glion manchentà da defender l'emprim plaz. Ils da la Foppa èn da nov sin il terz plaz cun 30 puncts, dus puncts davos Valposchiavo Calcio ch'ha battì la fin d'emna il FC Landquart cun 1:0. Trun/Rabius resta sin il 9avel plaz cun 12 puncts.

Pussibel ch'i dat anc ina giada il derbi sursilvan tranter Trun/Rabius e Schluein Glion en questa stagiun. Omaduas equipas èn anc da la partida en la Cuppa Grischuna e pudessan s'inscuntrar en il final dals 18 da matg a Cuira. Il CB Trun/Rabius dat ses mezfinal a Tavanasa encunter Valposchiavo Calcio, in duel tranter duas equipas da terza liga, e l'US Schluein Glion dat ses mezfinal ordaifer encunter il CB Surses, in'equipa da 4. liga.

RTR actualitad 17:00

Artitgels legids il pli savens