Per il Club da ballape Trun/Rabius hai finalmain dà ils emprims puncts en la nova stagiun da 3. liga. L'equipa che vegn trenada da nov da Claudio Bundi ha suenter trais terradas en seria festivà l'emprima victoria. Trun/Rabius ha battì ordaifer il FC Landquart cun 3:1.
In'emprima terrada hai perencunter dà per l'US Schluein Glion. Ils Sursilvans han pers ordeifer encunter il FC Schaan cun 0:3. Per l'equipa dal Principadi dal Liechtenstein èsi la quarta victoria en il quart gieu da campiunadi.
Terrada per Cuira 97
En la segunda liga interregiunala perda Cuira 97 ordaifer cunter il FC Thalwil cun 1:3. Gia da pausa manava l'equipa dal chantun Turitg cun 2:0. Per l'equipa da la chapitala grischuna èsi la segunda terrada en il quart gieu da campiunadi.
Nagina schanza per Domat e Valposchiavo
Ina fin d'emna d'emblidar èsi stà per las duas equipas grischunas en la segunda liga regiunala. Tant il CB Domat sco er Valposchiavo Calcio han pers lur partidas da chasa. Domat ha pers encunter il FC Herisau cun 1:2 ed ils Puschlavins han pers encunter il FC Au-Berneck cun 1:3.
Ils da Domat han uschia suenter quatter gieus da la nova stagiun stuì magunar la terza terrada en fila.
Per Valposchiavo Calcio èsi stà la segunda terrada dapi ch'els han dà lur premiera en la segunda liga.
